Mag-uuma kritikal human gipusil

Thursday, March 18, 2010

SA ka mag-uuma kritikal ang kahimtang sulod sa ospital human gipusil sa wa mailhing mga suspek samtang nanihapon sulod sa iyang balay didto sa Purok 12, Sityo Binugsayan, Barangay Napnapan, lungsod sa Pantukan, Compostela Valley (Comval) province.

Ang biktima naila nga si Cornelio Macasay, 66, ug molupyo sa maong dapit.

Have something to report? Tell us in text, photos or videos.

Sa report gikan sa Comval Province Police Provincial Office, nasayran nga nahitabo ang pagpamusil pasado alas 7:00 sa gabii niadtong Martes.

Nanihapon ang biktima uban sa iyang asawa sulod sa ilang balay dihang kalit nga miabot ang wa mailhing mga mamumuno.

Sa way paglangan, gipusil ang biktima gamit ang kalibre .45 nga pistola.

Si Macasay, nahiagom og mga samad pinusilan sa kalawasan ug daling gidala sa Davao Regional Hospital sa siyudad sa Tagum.

Mga suspek, abtik nga misibat padulong sa wa matinong lugar human sa pagpamusil.

Sa inisyal nga pakisusi sa kapulisan, nasuta nga gisuong sa mga suspek ang biktima ilawon sa iyang balay ug didto siya gipusil.

Mga miresponding kapulisan, nakahipos og mga basiyo sa kalibre .45 nga pistola nga maoy gituohang gigamit sa mga killer sa pagpatay sa biktima.

Ang kapulisan sa lungsod sa Pantukan, mihimo na og dugang imbestigasyon sa nahisgutang hitabo.(Marvin Pineda)