USA ka magtiayon ang gisikop sa mga otoridad atol sa gilusad nga operasyon tungod sa pagpayuhot og illegal nga druga didto sa Barangay Mankilam, dakbayan sa Tagum, Sabado sa buntag.

Mga dinakpan mao ang magtiayong Ruth Sultan ug Maning Sultan, ug molupyo sa Purok Crig sa maong barangay.

Sa nahagpat nga report gikan sa kapulisan nasayran nga alas 8:00 sa buntag nasikop sa hiniusang pwersa gikan sa intel section sa Tagum City Police Station ug Davao del Norte Police Provincial Office ang mga dinakpan didto sa nahisgutang dapit.

Nasakmit sa mga otoridad gikan sa mga dinakpan ang upat ka mga sachet sa gituohang shabu, upat ka way sud nga sachet, aluminum foil, tooter, sim card, ug klase-klasing mga cellphone.

Gibanabana nga mokabat sa P20 mil ang illegal nga druga ug drug paraphernalia nga nasakmit sa mga otoridad.

Sa inisyal nga imbistigasyon sa kapulisan nasayran nga ang mga suspek nagrenta lamang sa balay nga gipanag-iyahan sa usa ka Zuela Abordo.

Nasuta sab nga ang suspek nga si Maning usa ka cellphone technician, ug usahay operator og chainsaw.

Gitanggong na karon sulod sa selda ang mga suspek samtang giimbistigahan pa kapulisan.

Kasong pagpayuhot og ilegal nga druga ang gihikay karon sa mga otoridad batok sa mga dinakpan. (Marvin Pineda)