Magtiayon suspek sa tulis

Tuesday, September 7, 2010

USA ka magtiayon ang nadugang sa ihap sa mga suspetsadong tulisan ang gisikop human nasuta nga duna silay kalabutan sa pagtulis sa Rural Transit Bus didto sa Sitio Pagan Grande, Barangay Tamugan, distrito sa Marilog, siyudad sa Davao niadtong Septiyembre 1.

Ang maong insidente miresulta sa pagkamatay ni SPO1 Ronie Panganiban, sakop sa Marilog Police Station, kinsa gipusil sa mga tulisan dihang ilang gitulis ang mga pasahero sa Rural Transit dunay plate number KTV-949 nga gimaneho ni Noel Nicor.

Have something to report? Tell us in text, photos or videos.

Post your reaction to the Manila hostage crisis

Ang magtiayong Cirilo ug Carmen Alfeche gisikop sa kapulisan niadtong Lunes human gilambigit sa ilang mga kauban nga apil sila sa nahitabong pagpanulis nga miresulta sa pagkasikop sa mga suspetsado ug pagkapatay sa ilang "mastermind" nga si Ricky Pardillo, ex-convict sa Davao Penal Colony (Dapecol) ug nagpuyo sa Cecilia Homes, Barangay Cabantian, Buhangin District.

Si Pardillo gitakdang sikupon sa kapulisan human nasuta nga siya suspek sa pagpanulis apan dihang gihangyo siya sa mga pulis nga moampo nga malinawon, misukol siya hinungdan nga gipusil sa sakop sa Swat.

Nakuha sa kapulisan gikan sa suspetsado ang usa ka Colt .45 caliber pistol, usa ka MK2 grenade ug mga cellular phones human siya napatay.

Ang magtiayong Alfeche gidemanda sa kapulisan og kasong Robbery with Homicide uban nila Eduardo Priete, Efren Manguray ug Rene Oracion pinaagi sa summary inquest procedure ug nakadoket sa IS # XI-02-INQ-10-I-00850 didto sa City Prosecution Office (CPO) niadtong Lunes.

Ang magtiayon nasuta sa kapulisan nga nalambigit sa krimen sanglit mikanta si Benito Pepito nga miadto ang magtiayon sa ilang bay ug nangita kang Pardillo aron kuhaon ang ilang bahin.

"We arrested the couple after one of the witnesses (Benito Pepito) pinpointed them as the accessories to the crime," ni Police Senior Inspector Leonardo Pamplona sa Investigation Detection and Management Branch (IDMB) sa Davao City Police Office (DCPO).

Si Pepito unang gidakop sa kapulisan tungod sa pagtuo nga apil siya sa krimen sanglit didto nagbinahinay ang mga suspetsado sa ilang tinulis nga salapi, apan napamatud-an nga wa siya'y apil mao nga gibuhian siya niadtong Lunes.

"Pepito informed us that the couple went to their house asking the whereabouts of Pardillo because they wanted to get their share as payment for their firearms used by the suspects," suma ni Pamplona.

Si Carmen mihilak atubangan sa SuperBalita ug nangatarungan nga wa silay kalabutan sa krimen sanglit igo lang misaka ang mga suspetsado sa ilang balay.

"Nagkaila na siya sa akong bana niadtong Agosto dihang nahospital ko didto sa Marilog. Miabot na sila didto sa balay niadtong Agosto 31. Didto sila natulog kay mopalit daw sila og yuta. Pagkasunod adlaw mibalik sila sa balay pero wala mi nakabalo sa ilang trabaho," pahayag ni Carmen.

Gawas sa lima ka mga suspetsado, gidemanda na sab sa kapulisan ang tulo ka mga tawo nga sila Melvin Pepito, alyas Pikot ug alyas Edwin pinaagi sa regular filing didto sa CPO.

"We are waiting the warrant of arrest be issued by the court so we can have a legal basis to apprehend the remaining suspects," ni Pamplona sa SuperBalita. (Alger Dura)