USA ka mangingisda gipusil, patay didto sa siyudad sa Cotabato.

Ang kapulisan nag-ila sa biktima nga mao si Sammer Ambat, 40 anyos, minyo ug molupyo sa barangay Kalanganan.

Sigun sa taho gikan sa Cotabato City Police Office nga banda alas 6:40 sa gabii, Nobyembre 3, gi-andam na sa biktima ang iyang pukot ug bangka kay paingon na unta nga mangisda sa Illana Bay sa Parang, Maguindanao Province.

Apan kalit siya giduol sa wala mailhing mga armadong kalalakin-an ug gipusil gamit ang M16 armalite rifle.

Patay diha dayon si Ambat nga natagud-tagod sa mga bala ang nagkadaiyang bahin sa kalawasan samtang ang mga suspek dali nga misibat paingon sa wala matino nga direksyon.

Gipahayag ni Samaila nga una gipatay ang iyang bana, nakadawat kini og hulga gikan sa wala mailhing grupo gumikan sa iyang pagtabang sa mga otoridad sa kampaniya batok sa illigal fishing sa maong dapit.

Ang kapulisan padayong nag-imbestiga aron masuta ang tinuod nga hinungdan sa hitabo ug madakpan ang mga suspetsado.(Edgardo Fuerzas)