USA ka Japanese descendant ang gipusil sa wa mailhing suspetsado samtang naghigda sa usa ka lingkuranan nga nahimutang sa balkonahe sa ilang bay niadtong Domingo.

Ang biktima kinsa gipusil sa alas 9:20 sa buntag mao si Jerome Quaquin, 49, minyo, nagpuyo sa Blk. 16, Lot 20, Paris St., Rosalina Village III, Barangay Baliok, siyudad sa Davao.

Nasayran sa Superbalita gikan sa Talomo Police Station, ang biktima kalit lang gipusil sa wa mailhing suspetsado samtang nagpahulay hinungdan sa pagkaigo sa iyang liog ug tiyan.

Si Quaquin, sumala sa mga nakasaksi, nakahimo pa sa pagdagan ug misulod sa bay aron dili tiwasan sa suspetsado.

Ang suspetsado kinsa nakamatikod nga mitago ang biktima ug di na siya makahigayon sa pagpusil kang Quaquin, dali nga misibat gikan sa nahitaboan sakay sa Honda Wave nga kolor blue.

Human nakaikyas ang suspetsado, ang asawa sa biktima nanawag dayon sa Central 911 aron tabangon ang iyang bana ug dalhon sa tambalanan.

Ang biktima gidala sa mga sakop sa Central 911 Ambulance 09 didto sa Davao Medical Center (DMC).

Ang biktima padayong giatiman karon sa mga doktor sa maong tambalanan. Hinuon, luwas na siya sa makuyaw nga kahimtang.

Mga silingan nagsulti nga gikan sa nasud Japan ang biktima ug gidudahang dunay karaan nga panagbingkil hinungdan nga gipanimaslan siya sa suspetsado.

Mga imbestigador sa Talomo Police Station padayong nagsusi karon sa maong hitabo aron tinuon kung unsa ang motibo ug ilhon ang suspetsado. (AD)