NITABANG na ang kapulisan sa lungsod sa Matanao, Davao del Sur aron pangitaon ang maglive-in partner nga gitudlong nidagit sa sakyanan sa usa ka Koreano niadtong Nobyembre 1.

Kahinumduman nga ang Matanao Police Office nakig-alayon sa pagresponde uban ang mga personahe sa Sta. Ana Police Station didto sa dakbayan sa Davao, pinangunahan ni Senior Inspector Ranulfo Cabanog, aron adtuon ang panimalay sa suspek.

Mga ala 1:15 sa hapon niadtong Biyernes, dihang giadtoan sa mga pulis ang bay sa mga suspek nga sila Jezfrel Subigce, 27, taga Barangay Camanchiles sa lugar ug kaipon niining si Elizabeth Padillo, apan pakyas sila sanglit daw nakatimaho mao nga daling nakasibat.

Nahibulong sab kaayo ang mga pulis kon nganong ang kolor Green nga Revo, nga gipanag-iyahan sa Korean National nga si So-Ok Kong, negusiyante ug lumolupyo sa Ladislawa, Buhangin, siyudad sa Davao, didto na nakit-an sa lungsod sa Padada, Davao del Sur.

Dili na sab mao ang plakang WKU 329 sanglit nailisdan kini sa plakang LFL 782 ug giparada atubangan sa balay sa magtiayong Cerilo Cervantes, kinsa molupyo didto sa Sitio Bagong Silang, Almendras District sa lungsod sa Padada.

Gikanayon ni Inspector Melgrace Driz, hepe sa Matanao PNP nga nitabang na sila karon aron pangitaon ang mga suspek kinsa gituohang anaa ra nagtago-tago sa ilang area of responsibility.

Gidala na sa kapulisan sa Sta. Ana ang sakyanan sa langyaw apan padayong gisubay kung nganong didto kini nakit-an sa panimalay sa mga Cervantes.

Nasayrang gikasuhan na sab ang mga tawong gitudlong nidagit sa sakyanan. (Orlando B. Dinoy)