PORMAL na nga giila sa kapulisan ang mga suspek nga midagit kang John Kyle Dui Chiongson, anak sa usa ka Chinese-Muslim rice trader ug kanhing disc jockey sa 93.7 Star FM sa siyudad sa Cotabato.

Gitanggal na usab ni Autonomous Region in Muslim Mindanao Governor Datu Zaldy Ampatuan ang tanang mga deputized agent sa Land Transportation Office (LTO)-Armm nga nalambigit sa pagkidnap sa biktima.

Mibahad usab ni Cotabato City Mayor Muslimin Sema nga kon dili mosurender ang mga suspek ug mosukol sa otoridad, kuhaon patay man o buhi.

Nagpagawas na og warrant of arrest ang korte sa Cotabato batok ngadto sa mga suspek nga sila Nasser Kasim, puganti sa City Jail, Henry Demali ug ang mastermind nga si Mohaimin Abo alyas Kumander Utto Tubog sa Pentagon Kidnap Gang nga adunay igsuon nga opisyal sa MILF.

Nasayran nga usa lang ka ordinaryong tawo ang amahan sa biktima nga si John Chiongson nga adunay gamay nga puwesto sa bugasan sa siyudad ug sa Datu Piang, Maguindanao.

Nanawagan ngadto sa mga kidnaper ang mga personahe sa media sa Central Mindanao nga buhian ang bata gumikan masakiton kini ug dili kaya sa pamilya nga mobayad ug ransom money.

Matud ni MILF Civil Military Relation Chief Eid Kabalu nga ila na nga gipalihok ang ilang mga ginsakpan aron maluwas ang bata gikan sa mga suspek.

Hinuon, nagpasalig si Sema nga maningkamot siya aron maluwas ang biktima. (Edgardo Fuerzas)