NAHIUBOS ang mga Muslim sa Mindanao sa pagbawi sa gideklarar sa Malaca¤ang nga duha ka adlaw nga piyesta opisyal atol sa kasaulogan sa Eid'l Adha karong Nobyembre 27 ug 28 sa Autonomous Region of Muslim Mindanao (Armm).

Matud ni Kadatuan Indaila sa Office of Muslim Affairs nga dili kini angayang buhaton sa kagamhanan tungod kay ang mga Muslim wala lamang manimuyo didto sa lugar nga sakop sa ARMM kun dili sa nagkalainlaing lugar sa nasud.

Ang pamahayag ni Endaila maoy iyang reaksyon sa gisulti ni Presidente Gloria Macapagal Arroyo nga imbis ipatuman sa tibuok nasud ang duha ka adlaw nga holiday sa kasaulogan sa Eid'l Adha, adto na lang kini sa Armm.

Nasayran nga sa matag piyesta opisyal, ang usa ka trabahanteng motungha sa trabaho modawat og P130 sa unang walo ka oras ug 30 porsyento niini ang ipatong sa matag takna nga mosunod lapas sa 8 oras.

Kun ang maong holiday matunong nga 'day off' sa usa ka kawani unya patrabahuon siya, kinahanglang modawat siya og suhol nga P150 sa unang walo ka oras ug 30 porsyento niini ang ipatong sa matag oras nga mosunod.(Edgardo Fuerzas)