HUMAN gipatambalan sa gobyerno ang mga samaron nga rebeldeng New People's Army (NPA) niadtong Martes nanghasi gihapon ang maong grupo pinaagi sa pagpabusikad sa usa ka landmine didto sa Barangay Banlag, Monkayo, Compostela Valley Province.
Ang pagbusikad sa landmine nahitabo alas 12:40 sa hapon nga miresulta sa pipila ka minuto nga binakbakay tali sa mga rebelde ug mga sakop sa 1001st Infantry Brigade sa Philippine Army.
Nasayran nga samtang naglakaw ang mga sundalo sa national highway sa Monkayo, kalit lamang nga mibusikad ang landmine hinungdan nga nasurprisa sila 1 Lieutenant Cherry Jarabelo, Brigade Civil Military Operation Officer, uban ni Private First Class Anwar Sinsuat, kinsa MNLF Integree, ug walo ka mga sakop sa ilang tropa.
Human sa maong pagbusikad, misunod dayon ang sunod-sunod nga buto sa armas hinungdan nga mibawos ang mga sundalo ngadto sa mga rebelde kinsa daling misibog human nalupig sa pinusilay.
Si Colonel Roberto Domines, commander sa 1001st Brigade, nagbutyag nga ang iyang tropa gibanhigan sa mga rebelde aron mapugngan ang mga sundalo nga makasud sa lugar nga gitagoan sa mga rebelde didto sa lungsod sa Monkayo.
Matud ni Domines nga gihimo sab kini sa mga rebelde aron pugngan ang pagpatuman sa peace and development projects sa militar sa kabukiran.
"The atrocity staged by the NPAs is retaliation for them to save face after they were humiliated in seeking government's help in rescuing their wounded comrades confined at Bislig District Hospital in Surigao del Sur. Despite fighting the government, they are now seeking the government's help", ni 10th Infantry Division spokesperson Lieutenant Colonel Lyndon Paniza sa iyang gipadangat nga pahayag sa Superbalita.
Kahinumduman, si Davao City Acting Mayor Rodrigo Duterte maoy nagkuha sa mga samaron nga rebelde human nangayo og panabang kaniya ang labaw sa mga NPA nga si Kumander Jess.
Usa sa mga samarong rebelde nga gipatambalan ni Duterte mao si Vanessa Tropico Delos Reyes nga taga Calinan, ning siyudad sa Davao.
Si Delos Reyes maoy usa sa mga samaron dihang nahitabo ang engkwentro sa militar didto sa Barangay Aliwagwag, Cateel, Davao Oriental.
Ang maong rebelde gikatahong anaa sa kritikal nga kahimtang sud sa Southern Philippines Medical Center (SPMC). (Alger Dura)