ANG kapulisan sa dakbayan sa Tagum naggukod karon sa usa ka lalaking midunggab ug miilog sa motor sa usa ka habal-habal driver nga iyang gisakyan didto sa may Purok 28, Kawayanan, Barangay Madaum, dakbayan sa Tagum.

Giila sa kapulisan ang biktimang habal-habal driver nga mao si Glen Albastro, 43, ug molupyo sa barangay Madaum.

Sa report nga nahagpat gikan sa Tagum City Police Station nasayran nga pasado alas 9:00 sa gabii niadtong Lunes usa ka wa mailhing lalaki ang misakay sa motor sa biktima ug nagpahatud didto sa nahisgutang dapit.

Apan pag-abot nila sa mingaw nga dapit didto sa may Kawayanan, mimando ang pasahero nga ihunong ang motor.

Sa pagtoo nga mokanaug kini gihunong sab sa biktima ang iyang motor.

Kalit lamang nga mihulbot sa iyang hinagiban ang pasaherong suspek ug gidunggab ang biktima gamit ang kutsilyo tumong sa likod niini.

Human sa pagpanunggab ang suspek abtik nga misibat padulong sa wa matinong lugar tangag ang motor sa biktima.

Ang biktima ang nagkadugo pa nga nagpakitabang sa asawa sa usa ka Joel Gabuyo nga maoy nagdala kaniya ngadto sa ospital ug mitaho sa kapulisan.

Ang biktima ang nagpabiling anaa sa talandugon ang kahimtang karon sulod sa ospital.

Ang mga sakop sa Tagum City Police Station ang mihimo na og pakigsusi sa nahisgutang hitabo.

Samtang ang manhunt operation gilusad karon sa kapulisan aron sa pagpangita sa suspek. (Marvin Pineda)