TULO ka mga tawo ang gipangdala sa ospital human misungag sa usa ka jeepney ang ilang gisakyang motor didto sa Purok 2, Barangay Mainit, lungsod sa Nabunturan, Comval Province.

Mga biktima mao sila si Margado Sugudan, Riez Mating, ug Romy Casissid, ug pulos mga molupyo sa Purok 13, Matagdungan, Barangay Bukal, susamang lungsod.

Sa report gikan sa Comval Province Police Provincial Office nasayran nga nahitabo ang aksidente pasado alas 7:45 sa buntag niadtong Dominggo.

Sakay sa usa ka Honda TMX nga motor ang mga biktima nga gidrayabn sa biktimang si Sugudan.

Gikan ang mga biktima sa Barangay Bukal padulong unta sa Poblacion lungsod sa Nabunturan.

Apan pag-abot sa nahisgutang dapit, kalit nga mibangga sa usa ka jeep nga gidrayban sa usa ka Vicente Songahid ang motor sa mga biktima nga ilang gisundan.

Tungod sa pagkabangga nawad-an og balanse ang driver hinungdan nga nabalintong sila.

Pulos nahiagum og mga pangos ug bun-og sa kalawasan ang mga biktima ug daling gipangdala sa Montevista District Hospital.

Nasayran nga kalit nga miliko pawala ang jeep hinungdan nga wa nabantayan sa driver sa motor nga nagsunod ug mibangga sila.

Ang driver sa jeep mitahan sa iyang kaugalingon ngadto sa kapulisan aron atubangon ang salaod nga nahimo.

Samtang ang kapulisan sa Nabunturan ang mihimo na karon og dugang pakisusi sa aksidente. (Marvin Pineda)