USA ka lalaking gidudahang apil sa nagpahigayon og lumba sa motor kun gitawag og "drag race" nabalintong human nakit-an nga nagsingabot ang kapulisan.

Sumala sa taho sa Hagonoy Police Office, nga mga alas 2:00 ang takna sa hapon niadtong Biyernes sa dihang nahitabo ang insidente.

Sa paghiling sa otoridad, nailhan ang biktima nga mao si Mark Mahilum, 24, ulitawo ug lumolupyo sa Km. 80, sakop sa lungsod sa Sulop, Davao del Sur.

Ang kapulisan sa lungsod sa Malalag nga nakaagi sa Barangay Leling, Hagonoy, mao ang nialarma sa ilang mga kaubanan sa dapit bahin sa gipahigayong drag race.

Gumikan niini, paspas nga nitubag sa alarma ang kapulisan nga gipamunoan ni Senior Inspector Jaime Senarillos, ang hepe sa kapulisan.

Apan, dihang nakamatikod ang mga misalmot nga nagpadung ang kapulisan, nikaratil sila sa pagdagan nga niresulta sa pagkabalintong sa usa ka motorsiklo kay nawad-an og balanse ang drayber niini.

Hinuon, gidali pagtabang ang biktima padung sa Medical Center of Digos City (MCDC) ug padayong giatiman sa mga mananambal human nabun-og ug nangapangos ang lawas sa uwahi.

Nasuta sa otoridad nga way lisensiya ug way plaka ang kolor pula nga Honda XRM 125, iya sa biktima, mao nga gikostudiya kini karon didto sa istasyon sa kapulisan.

Nagpahimangno karon ang kapulisan ngadto sa mga drayber og single nga motorsiklo nga likayan gyud ang pag-apil sa delikado ug illegal nga duwa aron malikayan ang disgrasya.

Nahimong suliran karon sa kapulisan ang mga ingon niining gitawag og lingaw sa mga batan-ong dunay motorsiklo sanglit bisan og delikado daghan gihapon ang mosuway niini.

Laing impormasyon nga gitunol dinhi sa Sun.Star Superbalita nga aduna gihapoy gipahigayong drag race didto sa Barangay Rizal, sakop sa lungsod sa Bansalan, Davao del Sur, matag gabii, apan di masakpan sa kapulisan nga motubag sa alarma. (Dondon Dinoy)