Nag-inom og softdrinks gipusil

Saturday, March 20, 2010

USA ka tindero og pizza ang gipusil patay sa wa mailhing mga suspek samtang didto siya sa usa ka tindahan atbang sa ilahang balay sa Barangay West, dakbayan sa Tagum.

Giila ang biktima nga mao si Rafael Quitoga 23, molupyo sa Purok Bagong Lipunan, Barangay Magugpo West, sa maong siyudad.

Have something to report? Tell us in text, photos or videos.

Sa report gikan Tagum City Police Station nasayran nga nahitabo ang pagpamusil pasado alas 7:00 sa gabii niadtong Huwebes.

Samtang nag-imon og softdrinks ang biktima sa usa ka tindahan didto sa nahisgutang dapit kalit nga miabot ang duha ka wa mailhing mga lalaki, sa way paglangan gipusil ang biktima gamit ang 9mm nga kalibre sa pistola.

Nakahiagum og mga samad pinusilan sa ulo nga bahin sa iyang lawas ang biktima hinungdan sa iyang hinanali nga kamatayon.

Mga suspek ang abtik sab nga misibat padulong sa wa matinong lugar human sa pagpamusil.

Mga miresponding sakop sa kapulisan nakahipos og mga balines sa kalibre 9mm nga pistola didto sa crime scene nga gituohang maoy gigamit sa mga suspek.

Ang biktima matud pa nagtrabaho isip tindero og pizza sa may Tagum Overland Transport Integrated Terminal.

Kanhi na sab napriso ang biktima tungod sa kasong pagpanunggab.

Ginatan-aw karon sa mga otoridad ang anggulong pagpanimalos nga maoy motibo sa nahisgutang krimen.

Dugang imbestigasyon ang gihimo sa kapulisan sa nahisgutang hitabo. Marvin Pineda)