Nagbaklay giluba didto sa Maragusan

Monday, March 15, 2010

USA ka lalaki anaa sa talandugon ang kahimtang kagahapon sulod sa ospital human giluba sa wa mailhing suspek didto sa Sityo Butay, Barangay Pamintaran, lungsod sa Maragusan, Compostela Valley (Comval) province.

Giila ang biktima nga mao si Jomart Gesolgon, 20, ug molupyo sa Barangay Gredu, dakbayan sa Panabo.

Have something to report? Tell us in text, photos or videos.

Sumala sa report gikan sa Comval Province Police Provincial Office nga pasado ala 1:00 sa kaadlawon niadtong Dominggo nagbaktas ang biktima padulong sa ilang bunkhouse gikan siya sa ilang tunnel sa Sityo Butay.

Samtang nagbaklay siya wa siya masayud nga giatangan diay siya sa wa mailhing lalaki ug sa way paglangan gidunggab siya gamit ang mahait nga hinagiban.

Naigo ang biktima sa nagkadaiyang parte sa iyang kalawasan ug daling gidala sa Maragusan Municipal Hospital.

Apan tungod sa grabing samad nga iyang nahiaguman gibalhin siya sa Davao Regional Hospital sa dakbayan sa Tagum ug nagpabiling kritikal kagahapon ang iyang kahimtang.

Human sa hitabo ang suspek dali nga misibat padulong sa wa matino nga lugar.
Ang kapulisan sa lungsod sa Maragusan mihimo na og dugang imbistigasyon sa hitabo. (Marvin Pineda)