Nagbaligya og motorsiklo nga balor P9 mil, nadakpan

Wednesday, September 8, 2010

USA ka 21 anyos nga lalaki nga gisumbong nga namaligya og kinarnap nga motorsiklo sa kantidad lang nga P9 mil ang gisikop sa kapulisan didto sa lungsod sa Sta. Cruz, Davao del Sur.

Daling milihok ang mga sakop sa Sta. Cruz Police human nakadawat og taho gikan sa nagpakabanang sibilyan pinaagi sa pagmuntar og checkpoint.

Have something to report? Tell us in text, photos or videos.

Post your reaction to the Manila hostage crisis

Wa masayop ang kapulisan sa ilang pag-checkpoint gumikan kay didto mismo miagi ang suspek nga nailhan nga si Gabriel Magaña, ulitawo ug lumolupyo sa dalang Lapu-Lapu-Bataan, siyudad sa Digos.

Gihulagway ni Senior Inspector Alfredo Santilla, hepe sa kapulisan, nga gisakyan sa suspek ang kinarnap nga kolor pula nga Honda Wave, nagbaton sa plakang IP 1435 ug nasuta nga gipanag-iyahan sa usa ka Normon Darawis, taga Barangay Aplaya, lungsod sa Hagonoy, Davao del Sur.

Nasayran nga kuyog sa suspek ang laing usa pa ka kauban nga si Anthony Espanola, 25, ulitawo ug lomolupyo sa dalang Aurora Extension, siyudad sa Digos.

Subay sa pahayag sa mga otoridad nga banda alas 2 ang takna sa kaadlawon niadtong Martes, gikawat sa mga suspek ang motor ni Darawis nga giparada lang atubangan sa Monarca Clinic sa dakbayan.

Wala madugay, si Magaña nakit-ang nag-inusarang miadto sa merkado publiko sa Sta. Cruz alas alas 5:50 sa buntag aron nga mangita og mopalit sa motor. Apan wala na madayon ang transaksiyon sa suspek tungod kay nadakpan siya sa checkpoint sa kapulisan didto sa Sitio San Jose, Barangay Zone 4, Sta. Cruz.

Si Espanola nadakpan usab sa mga pulis apan didto na sa iyang pinuy-anan.

Nasayran lang ni Darawis ang panghitabo sa dihang gitawgan siya sa kapulisan nga kuhaon na ang iyang motorsiklo sa ilang buhatan.

Mga suspek gipaslak na sa selda sa kapulisan ug gihan-ay na ang kasong iduso batok kanila. (Orlando B. Dinoy)