Naghikog kay asawa nakig-sex

Monday, March 15, 2010

USA ka bana ang gikatahong nagpakamatay human nasakpan ang iyang asawa nga nakighilawas sa laing lalaki sulod sa ilang balay didto sa Barangay Maniki, lungsod sa Kapalong, Davao del Norte.

Giila ang biktima nga mao si Melecio (apelyido gipugngan sa Superbalita aron pamilya di maulawan), 36, ug molupyo sa susamang dapit.

Have something to report? Tell us in text, photos or videos.

Sumala sa report gikan sa Davao del Norte Police Provincial Office nga pasado alas 9:00 sa buntag niadtong Sabado nadiskubrihan ang biktima sa iyang mga kabanay nga nagbitay na ug wa nay kinabuhi sulod sa ilang lawak nga gituohang nagpakamatay.

Ang biktima naghikog pinaagi sa paghigot og pisi sa iyang liog dayon bitay sa iyang kaugalingon.

Sa inisyal nga pakisusi sa mga otoridad nasuta nga una pa gikatahong nagpakamatay ang biktima nag-inom kini og alak hangtud nga naghubog.

Matud sa taho nga nasakpan sa bana ang iyang asawa nga nakighilawas sa laing lalaki sulod mismo sa ilang balay.

Tungod kay nga di maantus sa biktima ang kasakit sa gihimong pagluib kaniya sa iyang kapikas, nakadesisyon siyang tapuson ang iyang kinabuhi.

Ang biktima gisuwayan pa og dala sa ospital apan gideklarang dead on arrival sa mga doktor.

Ang kapulisan sa lungsod sa Kapalong mihimo na og dugang imbistigasyon sa hitabo.

Gisusi sab sa kapulisan kung dunay foul play sa kamatayon niini. (Marvin Pineda)