PATAY ang usa ka 39 anyos nga lalake human kini gipusil sa mga armado didto sa dakbayan sa Cotabato.

Ang kapulisan nag-ila sa biktima nga si Tongan Ali, ug molupyo sa barangay Rosary Heights 6.

Base sa taho gikan sa Cotabato City Police Office, alas 6:40 sa gabii, niadtong Dominggo nahitabo ang pagpamusil.

Samtang sakay ang biktima sa iyang biseklita gikan namaligya og puto nihapit kini sa usa ka tindahan sa Rosales Street ug nakig-inom sa iyang duha ka mga barkada.

Dihang medyo nahubog na, kalit nga nagkalalis ang maghigala sa wala matino nga rason.

Aron malikayan ang away mi-uli na lamang si Ali.

Apan wala niini damha nga giatangan siya sa wala mailhing suspek ug gipusil gamit ang kalibre.45 nga pistola.

Wala pa matagbaw ang suspetsado gilaslas pa ang liog sa biktima gamit ang kutsilyo.

Dali-dali nga miiskapo ang mga mamumuno paingon sa wala matino nga direksyon dihang nasiguro nga patay na si Ali.

Nagtuo si Cotabato City Police Director S/Supt. Willie Dangane nga posibling personal nga atraso ang motibo sa pagpatay sa biktima.

Apan ang asawa sa biktima nga si Cannah namahayag, nga sa wala pa gipatay ang iyang bana may nakabangi kini nga grupo gumikan sa problema sa gitukuran sa ilang panimalay.

Ang kapulisan padayong nagsubay sa hitabo aron masuta ang hinungdan sa pagpatay sa biktima, madakpan ang mga responsable sa krimen. (Edgardo Fuerzas)