USA ka batan-ong lalake ang nagpakamatay pinaagi sa pagpusil sa iyang kaugalingon samtang nagsud-ong sa haya sa iyang amahan sa alas 11:45 ang takna gabii niadtong Lunes didto sa Purok 3, Maa, ning siyudad sa Davao.

Base sa imbestigasyon sa Talomo Police Station, ang biktima mao si Vicente Guevarra Jr., 23 anyos, ulitawo, nagpuyo sa Purok 3, Barangay Maa.

Si Geuvarra gikatahong nagpusil sa iyang kaugalingon gumikan sa kaguol nga namatay ang iyang amahan nga si Vicente Guevarra Sr.

Si Alfredo, igsoon sa biktima, nagsulti nga nagdula pa og tong-its ang biktima sa dihang wala pa mahitabo ang insidente.

Matud ni Alfredo nga kalit misulod sa kwarto ang biktima ug pipila ka minuto ang milabay ilang nadungog ang masipa ng abuto sa armas.

Dihang ilang nadungog ang buto, daling silang misulod sa lawak sa biktima ug didto ilang nakita nga nagkadugo na ang ulo.

Si Guevarra nakabaton og samad sa luyo sa iyang ulo ug milapos sa duol sa walang mata hinungdan nga dali nilang gidala sa Davao Medical Center (DMC).

Ang biktima gitambalan sa mga doktor, apan base sa talaan sa hospital, siya nakbasan sa gininhawa sa alas 2:20 kaadlawon kagahapon.

Nakuha sa kapulisan sulod sa lawak sa biktima ang usa ka .38 nga rebolber model Power Custom NDEP MO, dunay serial number 112952.

Nasayran nga daan nang nagbahad ang biktima nga mosunod siya sa iyang amahan nga namatay gumikan kay di niya madawat ang kamatayon sa iyang amahan. (AD)