Napatay sa kilat

Wednesday, April 28, 2010

PATAY ang usa ka ulitawo human kini naigo sa makusog nga kilat sa probinsiya sa Sultan Kudarat.

Ang kapulisan nag-ila sa biktima nga mao si Renato Edao, 17 anyos ug molupyo sa Arakan, North Cotabato.

Have something to report? Tell us in text, photos or videos.

Sigun sa taho gikan sa Sultan Kudarat Police Provincial Office, nga banda alas 4:30 sa hapon, Abril 27, naglakaw ang biktima kilid sa basakan sa Barangay Tagisan, Lebak, gikan sa payag-payag sa gibantayan niya nga binuhing mga itik sa iyang amo sa diha nga kalit mibundak ang ulan, dungang sa naghagoros nga hangin ug pagka-taud-taud kalit milagapak ang dakong kidlat ug didto sentrong naigo ang ulitawo kinsa nilagpot mga 500 metros ang gilay-on gikan sa iyang gitindugan.

Gitabang ang biktima sa iyang mga kauban ug gidala sa Lebak District Hospital, apan gidiklara sa mga doktor nga dead on arrival gumikan sa grabeng sunog sa nagkadaiyang parte sa iyang lawas.

Matud ni Armand Duldulao, molupyo sa maong dapit, nga iya gyud nakit-an nga nagkirig-kirig ang biktima sa diha nga naigo kini sa kilat nga dunay kusog kaayo nga boltahe sa kuryente.

Gipahayag sa mga barangay opisyal sa maong dapit nga pipila na ka higayon nga nahitabo nga nangamatay ang ilang mga binuhing kabaw, baka ug kambing nga naigo sab sa kilat.