USA ka lalaki ang gipusil patay sa wa mailhing suspek samtang natulog kini sa duyan didto sa Purok 7, Sitio New Leyte, Barangay La Libertad, lungsod sa Sto Tomas, Davao del Norte.

Ang biktima mao si Junnie de Felipie, 50, ug molupyo sa maong dapit.

Sa report gikan sa Davao del Norte Police Provincial Office, nasayran nga nahitabo ang pagpamusil pasado alas 6:00 sa gabii niadtong Sabado.

Nahinanok og katulog ang biktima sa usa ka duyan nga iyang gihimo didto sa ilang panimalay sa nahisgutang dapit.

Kalit lamang nga miabot ang wa mailhing mga lalaki sakay sa usa ka Honda XRM nga motor ug gipusil ang biktima gamit ang kalibre .45 nga pistola sa tulo ka higayon.

Naigo ang biktima sa nagkadaiyang parte sa iyang kalawasan hinungdan sa iyang hinanaling kamatayon.

Human sa pagpamusil, ang mga killer, abtik nga misibat padulong sa wa matinong lugar.

Mga miresponding sakop sa Sto. Tomas Municipal Police Station nakahipos og tulo ka basiyo sa kalibre .45 nga pistola nga maoy gituohang gigamit sa mga suspek.

Matud pa sa mga nakasaksi nga ang suspek nakasul-ob og bonnet nga mipusil sa biktima.

Sigun sa taho gikan sa kapulisan, nasayran nga ang biktima dunay naka-pending nga kasong kawat ngadto sa korte.

Padayon ang imbestigasyon sa Sto. Tomas Police Station sa nahisgutang pagpamusil. (Marvin Pineda)