Negusiyante gipatay

Monday, March 15, 2010

PATAY ang usa ka negusiyante human kini gipusil sa mga armadong grupo didto sa probinsiya sa Cotabato.

Kapulisan nag-ila sa biktima nga mao si Nasser Tamayatin, 46 anyos, minyo, buy and sell trader, ug molupyo sa barangay Kabasalan, Pikit.

Have something to report? Tell us in text, photos or videos.

Sa taho nga nakuha gikan Cotabato Police Provincial Office, alas 2:20 sa hapon, Dominggo, nahitabo ang pagpamusil sa negusiyante.

Sumala pa nga samtang sakay ang biktima sa usa ka lawin nga dyip gikan sa barangay Poblacion pauli sa iyang bay, giatangan na diay kini sa wala mailhing mga armadong lalaki ug gipusil gamit ang .45 nga pistola.

Patay diha dayon si Tamayatin human maigo sa iyang ulo ug dughan, samtang ang mga mamumuno dali nga misibat sakay sa usa ka XRM nga motorsiklo paingon sa wala matino nga direksyon.

Matud ni Alibai, sa wala pa gibugha ang iyang bana may naghulga kaniya nga mga rebeldeng grupo nga siya patyon kun ugaling dili kini musoporta sa ilang grupo.
Dugang niya, wala sab niya mamay-ungi ang mga suspek gumikan pulos sila naka-helmet.

Apan dako ang pagtuo ni Pikit Municipal Mayor Sumulong Sultan nga posibleng selos sa negosyo o personal nga atraso ang hinungdan sa pagpatay sa negusiyante.

Ang kapulisan sa Pikit pinanguluhan ni Chief Inspector Bernard Tayong milusad na og hugot nga imbestistigasyon aron ma-establisar ang tinuod nga motibo sa pagpusil patay sa biktima, mailhan ug madakpan ang mga tawong nagpaluyo sa krimen. (Edgardo Fuerzas)