USA ka bana kinsa nagplanong hiloan ang iyang tibuok pamilya ang napalgang wala nay kinabuhi human niya giinom ang usa ka garapang pamatay insekto (Thiodan) sa alas 9:00 sa gabii niadtong Lunes.

Si PO3 Roland Arado, duty investigator sa Baguio Police Station, nag-ila sa biktima nga mao si James Dawanan Sumandang, 44, minyo, nagpuyo sa Purok Taboa, Barangay Wines, distrito sa Baguio, siyudad sa Davao.

Base sa spot report ni Arado, nasayran nga ang biktima nasiplatan sa iyang kabanay nga nagbula-bula ang baba ug nanimahong medisina sa insekto.

Sila nangangha sa ilang nakita sanglit dili sila makatuo nga maghilo sa kaugalingon si Sumandang.

Giingon nga gisulayan pa sa asawa sa biktima nga luwason ang iyang bana apan wala na kini magginhawa mao nga gipahibalo nila ang kapulisan.

Mga silingan sa biktima nagbutyag nga niadtong miaging mga semana nakadungog sila gikan sa namatay nga iyang tapuson ang iyang kinabuhi pinaagi sa paghilo lakip ang iyang tibuok pamilya.

Ang kapulisan nagbutyag nga ang motibo sa biktima nganong  nagpakamatay mao ang dili tiaw nga depresyon ug pangabugho ngadto sa iyang asawa.

Nagpasalamat ang kabanay sa biktima nga wala mahinayon ang dautang plano niini nga hiloan ang iyang tibuok pamilya.

Ang patay'ng lawas sa biktima atua karon gihaya sa Angel Funeral Homes sa Calinan samtang giandam ang paghatud sa iyang katapusang pahulayan.