GIHUGTAN karon sa militar ang paglutos sa mga miyembro sa New People's Army (NPA) sa probinsiya sa Cotabato.

Sigun sa taho gikan sa Tactical Command Post sa 6th Infantry (Kampilan) Division sa Philippine Army nga banda alas 6:20 sa gabii, April 29, gisulod sa gibana-bana nga 30 ka mga NPA ubos sa Front Committee 53, ang bay ni Barangay Noa, Magpet Cotabato barangay chairman Gideon Tamonde, apan nabantayan ni Kapitan Tamonde kinsa abtik nga miambak sa ilang bintana ug mitago tunga-tunga sa ilang basakan.

Matud sa pamilya ni Tamonde nga gikuha sa mga rebelde ang 2-way radio, usa ka .38 rebolber ug usa ka garand rifle nga gipanagiyahan sa maong barangay opisyal.

Nagbahad usab ang mga rebelde nga patyon ang kapitan kung ugaling mosuporta siya sa kasundaluhan.

Padayong gihasi sa mga NPA ang North Cotabato ug usa sa mga tumong nila mao ang pamilyang Piñol nga misupak sa Permit to Campaign fee sa mga rebelde sa mga kandidato nga buot mangampanya sa ilang mga kontroladong dapit, ilabina ang tiilan sa Mount Apo.

Sunod-sunod sab ang pagpangatake sa mga NPA sa posisyon sa militar. (Edgardo Fuerzas)