Opisyal sa NPA nasikpaw

Wednesday, September 8, 2010

USA ka dakong opisyal sa mga rebeldeng New People's Army (NPA) gipresentar sa kadagkoan sa 10th Infantry Division ug Davao del Sur Provincial Police Office ngadto sa media human nadakpan sa mga otoridad niadtong Lunes.

Sa hiniusang PNP ug military press conference niadtong Martes, giila ni 10th ID spokesperson Lt. Col. Medel Aguilar ang dinakpan nga si Percival Manimog y Lechedo, labing nailhan nga Ka Bingbong sa Front Committee 51 ug deputy secretary sa Southern Mindanao Regional Command (SMRC) sa NPA.

Have something to report? Tell us in text, photos or videos.

Post your reaction to the Manila hostage crisis

Si Manimog naglihok sa lalawigan sa Davao del Sur apan didto siya nadakpan sa lungsod sa Monkayo, Compostela Valley Province niadtong Lunes.

Sumala ni Aguilar nga ang nasikop maoy sunod sa ranggo ni Rachel Daguma, alyas Ka Jasmin, nga nagalihok sa mga dapit sa Sta. Cruz, siyudad sa Digos, mga lungsod sa Magsaysay ug Bansalan, nga pulos nahisakop sa probinsiya sa Davao del Sur; Toril District sa dakbayan sa Davao ug sa lungsod sa Makilala, probinsiya sa North Cotabato.

Dugang pa ni Aguilar nga dunay mga warrant of arrest ang dinakpan gumikan sa pipila ka mga giatubang nga kasong murder.

Gitaho nga si Manimog lumolupyo sa Sitio Bagong Silang, Barangay Luayon, lungsod sa Makilala, apan nanimuyo karon didto sa Barangay Hagimitan Recop, probinsiya sa Compostela Valley.

Gisulti ni Aguilar nga si Manimog niangkon nga nalambigit sa kasong pagpatay ni Sgt. Pimentel, pagpamanhig sa negusiyanteng sila si Lovely Paraiso, nga niresulta sa kamatayon sa iyang bana didto sa Makilala niadtong Pebrero 25, 2010.

Laing kasong murder sab ang gi-atubang niini niadtong Hulyo 21, 2005 dinhi sa dakbayan.

Apan gipahayag ni Manibog nga nihawa na siya sa kalihukan sukad pa niadtong Marso 2006.

Sumala sa militar nga ila pang subayon kon unsa ka tinuod ang pahayag ni Manimog nga nihawa na siya sa kalihukan.

Nasayran nga 3rd Special Forces Batallion sa 1003rd Infantry Brigade sa Philippine Army pangulohan ni Lt. Col. Ferdinand Napoli maoy nakasikop sa rebelde.

Siya nag-atubang usab og kasong murder nga nakadoket sa criminal case number 210 (05) basi sa warrant of arrest nga gipagula ni Acting Judge Carmelita Sarno Davin sa 11th Judicial Region- Branch 19 sa dakbayan sa Digos niadto lang Hulyo 21, 2010.

Laing kasong murder nga nakadoket sa criminal case number 6146-04 basi usab sa warrant of arrest nga gipagula ni Presiding Judge Vicente Mondragon sa 1st Municipal Circuit Trial Court (MCTC) sa Makilala-Tulonan, Makilala, North Cotabato.

"Our action is always governed by the rule of laws, he will undergo legal procedures. In the meantime we will turn-over him to higher command," pung ni Aguilar.

Si Lt. Col. Oliver Artuz, commanding officer sa 39th Infantry Battalion, nagkanayon nga ang pagkasikop ni Manimog makapahinay sa kalihukan sa NPA sa Rehiyon 11 sanglit usa siya ka dakong opisyal.

Gidason sa 10th ID nga ilang tun-an ang mga dokumentong nakuha gikan sa posisyon ni Manimog aron ilang magamit sa anti-insurgency operation. Gikonsidera sab nilang usa ka dakong kawad-on sa NPA ang dinakpan sanglit dako ang posisyon nga iyang gihuptan. (Orlando B. Dinoy)