Pacquiao gihapon

Sunday, March 14, 2010

SI SEVEN-division champion Manny Pacquiao padayong naghupot sa iyang World Boxing Organization (WBO) welterweight title pinaagi sa unanimous decision nga kadaogan batok sa iyang challenger nga si Joshua Clottey didto sa Cowboys Stadium sa Arlington, Texas niadtong Sabado (Domingo dinhi sa Pilipinas).

Ang score 120-108, 119-109 ug 119-109, tanan pabor sa pound-for-pound king.

Have something to report? Tell us in text, photos or videos.

Ang 12 rounds nga away maoy unang title defense ni Pacquiao human sa iyang technical knockout nga kadaugan batok Miguel Cotto niadtong Nobyembre 2009.

Mga boxing analysts mitagna sa maong away nga mahuman sa katapusang round nga magmadaugon si Pacquiao.

Si Pacquiao karon adunay 51-3-2 nga rekord samtang si Clottey dunay 35 ka daog ug upat ka pildi.

Ang referee sa maong away nga gititulohan og "The Event" mao si Rafael Ramos samtang ang mga hurado mao sila Levi Martinez, Nelson Vasquez ug Duane Ford.

Sama sa miaging mga away, ang away ni People's Champ Manny Pacquiao didto sa Cowboys Stadium sa Arlington, Texas kagahapon (oras dinhi sa Pilipinas) gitambungan sa mga inilang lokal ug internasyunal nga personalidad, lakip na ang iladong atleta sa kalibutan.

Si kanhi Ilocos Sur governor Luis "Chavit" Singson ug asawa ni Pacquiao, Jinkee, milupad paingon sa Estados Unidos aron suportahan ang boksingero.

Nasiplatan sab sa maong stadium mao sila Mexican boxer Marco Antonio Barrera, kanhi American football linebacker Charles Haley, kanhi football coach Barry Switzer, retired football quarterback Troy Aikman, Puerto Rican boxer Miguel Cotto, American football wide receiver Milels Austin, sportscaster ug kanhi American football wide receiver Drew Pearson, ug Harrion Barber.

Ang maong away gilantaw sa 50,994 ka mga tawo nga mipuno sa $1.2 billion nga Cowboys Stadium, ikatulo nga pinakadaghang tawo nga mitan-aw sa kasaysayan sa boksing.

Unang namantala nga gidaghanon nga motan-aw sa maong away 45,000 ka mga tawo, apan ang tag-iya sa Cowboys stadium nga si Jerry Jones nagsulti nga modaghan pa ang ihap niini.

Dunay 42,000 ka lingkuranan ang nabaligya niadtong Biyernes, ug ang mga opisyal sa stadium midesisyon nga ibaligya nalang ang standing-room "party passes" sa kantidad ng $35.

Ang Cowboys Stadium nakahimo og attendance headlines niadtong miaging bulan nga dunay 108,713 ka mga tawo nga mitan-aw sa NBA All-Star Game.

Dionesia

Sama sa naandang mga away ni Manny, ang iyang inahan nga si Dionesia hugot nga nag-ampo nga modaug ang anak ug way dautang nahitabo kaniya.

Dihang gihinabi sa 103.5 Wow Radio, si Dionesia nagsulti usab nga naghuot ang iyang dughan nga naglantaw sa away sa iyang anak batok ni Clottey.

"Hanggang ngayon masakit pa ang dibdib ko sa subrang dasal na sana manalo si Manny para hindi mapahiya ang Pilipinas", pahayag sa inahan sa boxing icon.

Si Dionesia nagsulti usab nga ilang hangyuon si Manny nga paundangon na sa boksing.

"Pagdating niya yayakapin ko siya ng mahigpit at mag-miting kami ng aming pamilya upang patigilin na siya sa boksing", sumala ni Dionesia.

Bahin usab sa posibilidad nga madayon ang away ni Manny ug Floyd Mayweather Jr., si Dionesia nagsulti nga ilang pasabton si Manny nga mas maayong di na siya makigtakus sa boksidor.

"Tama na. Marami ng biyaya ang binigay sa kanya ng Panginoon", panapos ni Dionesia.

Piliay pahumanon

Human sa iyang malampuson nga pagpildi sa Ghanian nga si Clottey, gibutyag sa Pinoy boxing idol nga paghuman pa sa piliay karong Mayo 10 niya ihan-ay ang mosunod nga kumbati ibabaw sa boxing ring.

Tungod sa bag-ong kadaugan, gibandera karon ni Pacman ang rekord nga 51-3-2.

Malaumon si Pacquaio nga human niya mapildi si Clottey sunod niyang maka-atbang si Floyd Mayweather Jr., nga makigsukmagay kang Shane Mosley karong Mayo 1.

Sa pakighinabi kang Pacman human sa away, giangkon niini nga naglisod sab siya unsaon paglup-og sa depensa sa kalaban.

Niya, di siya makatuo sa depensa nga gipakita sa iyang kaatbang.
"It was not an easy fight. It was hard. He's a very tough fighter. I can't believe it," ni Pacquiao.