Pagbalasa sa Comelec gihimo

GIPATUMAN na sa buhatan sa Commission on Elections (Comelec) ang "reshuffling" sa ilang mga kadagkuan dinhi sa Mindanao sugod karong adlawa.

Magsugod na pag-opisina ang giingong suod ni Presidente Gloria Macapagal-Arroyo sa 2004 elections tungod sa "Hello Garci" tapes, nga mao na karon ang Southern Mindanao Regional Election Director nga si Atty. Ray Sumalipao.

Si Sumalipao kinsa gihulipan sab ni Atty. Remlane Tambuang didto sa Autonomous Region in Muslim Mindanao gidestino na dinhi subay sa mando ni Comelec chair Jose Melo.

Kahinumdumang gipatawag si Sumalipao sa usa ka senate hearing kalabot sa Hello Garci scandal human siya gipasanginlang miadto sa bay ni Arroyo didto sa La Vista, Quezon City.

Gikanayon kaniadto sa mga kritiko ni Arroyo nga ang maong wiretapped phone conversations tali ni Arroyo ug sa pipila ka opisyal sa Comelec aoy nakapadaug kaniya batok ni Fernando Poe Jr., kinsa gibiyaan og 700 mil nga boto.

Dinhi sa Davao del Sur, molingkod na sab karong adlawa si Atty. Marlon Casquejo, nga gikan sa probinsya sa Davao del Norte aron mohulip sa posisyon ni Atty. Maria Febes Barlaan nga ilabay sab didto sa probinsya sa Compostela Valley.

Wa gihapon namatay sa panumduman sa katawhan ang kontrobersyal nga Hello Garci scandal ilabi pa nga sa telebisyon mismo kaniadto nangayo og pasaylo si Arroyo diin alang niya usa kadto ka "lapse in judgement."

Apan bisan pa man og giingong kaalyado si Sumalipao ni kanhi Commissioner Virgilio Garcillano nagpabilin ang pagka-inosente niini sanglit way lig-ong ebedensya nga maglambigit kaniya sa iskandalo.

Dili lang mga tag-as nga opisyal sa Comelec ang nailisdan sa ilang lugar sanglit apil sab nga gihulipan ang election officer sa lungsod sa Malita, Davao del Sur nga si Mary Ann Cabahug.

Nagkambyo sab sila og posisyon ni Annabel Fernandez gikan sa lungsod sa Malalag, Davao del Sur.

Sumala pa suod si Cabahug ni kanhi Representative Claude Bautista nga subling moatbang ni Davao del Sur Governor Douglas Cagas.

Sa bag-ong mga opisyal sa Comelec dinhi sa rehiyon wa sab maklaro kun adunay himuong pagbalhin sa ubang election officer sa Davao del Sur human niguwa ang hungihong nga pipila kanila nahimo na sab nga suod sa ilang mga municipal mayors. (Orlando B. Dinoy)