Ni Ely M. Luciano
Magprangkahay Kita

PIPILA ka tuig ang atong antuson kun mosipyat kita og pili sa mga politiko nga di magtarung sa pagserbisyo sa higayon nga mapili sa posisyon nga ilang gidaganan.

Duna na kita'y leksiyon niini ug duna na sab kita'y kasinatian tungod kay nabiktima na kita sa pipila ka mga politiko nga maayo lang sa bolatik.
Tungod niini, di gayud maayo nga malukmay kita o madani sa mga nindot nga propaganda nga pulos lang labutsing.

Tan-awa ning ubang politiko, tungod kay mokandidato migasto og dako aron tabangan konohay ang mga OFW. Diay, gigamit lang kadto sa hingtungdang politiko alang sa iyang political propaganda.

Diay politiko nga matag duol na ang panahon sa kampanya sa piliay, I-propaganda dayon ang iyang kakabus kaniadto. Nagtuo tingale siya nga sayon lamang atikon ang katawhan.

Unta ato kining timan-an ug dili kita madala kinsay politiko nga kusog magasto sa propaganda. Dili kita madani sa mga tawo nga maayo kaayo mo-ulog-ulog kanato. Peligro kini nga matang sa politiko.

----
Sarangani

Atong nahisgutan ang politika, didto sa Sarangani nanukad na og maayo ang pundok ni boxing icon Manny Pacquiao alang sa umaabot nga piliay.

Si Pacquiao modagan pagka-kongresista sa lone district sa Sarangani. Sayo niini, gimugna ni Pacman ang iyang partido nga People's Champ Movement.

Napili sa partido Sarro nga moatbang ni Pacman mao si Roy, kaliwat sa adunahang pamilyang Chiongbian sa Sarangani.

Si Roy mao ang naghupot karon sa mga negosyo sa iyang pamilya.

Di pa karon dugay, nakadungog kita og mga estorya nga maningkamot ang pamilyang Chiongbian aron dili mahiadto sa laing kamot ang congressional district sa Sarangani.

Niadtong miaging adlaw, nagpagawas na si Pacman sa mga ngalan sa mga tawo nga iyang padaganon, gikan sa pagka-mayor ngadto sa pagka-gobernador sa Sarangani.
Apan wa kini makatarog ni Sarangani Governor Migs Dominguez kinsa nagsulti nga layo pa ang piliay ug ang maayong buhaton karon mao ang pagsilbi sa katawhan. Si Migs sakop sa partido nga Sarro.

Unsa kahay sangputan unya sa paghugpong sa mga pamilyang Chiongbian ug Dominguez sa ilang resources batok ni Pacman?

---
Motorsiklo

Unta magmatngon kining mga adunay motorsiklo. Daghan na ang nangamatay, daghan na sab ang nabaldado gumikan kay nadisgrasya sa motorsiklo. Dunay uban bisan og naka-inom tulin gihapon mopadagan. Dunay uban nga mokalit lang og "cutting" sa nag-unang behekulo samtang ang uban bisan og pigado ang dalan molusot gayud. Anugon ang kinabuhi nga mausik sa kadanghag ug sa sobra nga hangin sa ulo.