SI Comval Province Governor Arthuro "Cheongkie" Uy nabalaka tungod sa sagunson nga mga nahitabong tulis sa lalawigan sa Comval.

Sumala ni Uy nga iyaha na karon nga gitawag ang atensyon ni P/Senior Superintendent Aaron Aquino nga mohimo og lakang aron mapakgang ang maong binuhatan.

"Ako nang gitawag ang atensyon ni Col. Aaron Aquino aron mohimo og pamaagi aron masulbad ang mga tulis nga nahitabo dinhi sa atong probinsiya (Comval)," sulti ni Uy sa pakighinabi kaniya sa Superbalita.

Matud sa gobernador nga nakaapekto gayud sa lalawigan ang mga insidente sa tulis sanglit mibati na og kahadlok ang mga negusiyante magpadayon sa ilang negosyo.

Siya sab nanawagan sa mga hepe sa matag presinto sa kapulisan tibuok Comval nga santaon ang mga nahitabong tulis.

Gipasusi sab sa gobernador kon usa lang ba ka grupo ang responsable sa mga tulis nga nahitabo sa probinsiya.

Kahinumduman nga sagunson ang mga insidente sa tulis nga nahitabo sa Comval Province sa nakalabay nga semana.

Lakip sa gibiktima sa mga tulisan ang gasolinahan sa lungsod sa Nabunturan ug Monkayo, usa ka pampasaherong bus ug minero nga nag-inom lamang sulod sa usa ka balay imnanan nga gipusil pa sa mga suspek.

Samtang sa pikas bahin, gipaniguro sab sa kapulisan sa Comval nga santaon nila ang mga kaso sa tulis sa dapit.

Sumala ni Col. Aaron Aquino nga ilang ipatuman ang hugot nga pagbantay sa palibot batok mga tulisan.

Pagpatuman sab og police visibility ug checkpoint sa mga nagkadaiyang dapit ang ilahang himuon aron masikop ang mga tulisan nga misiaw sa lalawigan sa Comval. (Marvin Pineda)