Penas, Cagas ug Almendras nagtigi pagka mayor sa Digos

Friday, April 30, 2010

TULO ka mga pulitiko ang nag-indigay karon sa pag-ilog sa renda sa panggamhanan dinhi sa siyudad sa Digos.

Usa kanila kanhi kongresista, ang usa incumbent nga konsehal ug si Bise Mayor Joseph Penas, kinsa gituboy ni Mayor Arsenio Latasa ubos sa Nationalist Peoples Coalition (NPC) sanglit nidagan sab kini pagka-bise gobernador kuyog ni kanhi 2nd District Rep. Claude Bautista.

Have something to report? Tell us in text, photos or videos.

Si Alejandro Almendras Jr. nahimo nga representante sa unang distrito sa lalawigan tuig 1995 hangtod 1998, samtang si Penas mao ang bise mayor nga nahuman na sa iyang tulo ka termino ug ang 36 anyos nga si Cagas nga karon konsehal ug pag-umangkon ni Davao del Sur Governor Douglas Cagas.

Sa kasamtangan, nag-iyahay og pagawas sa nagkadaiyang isyu ang matag kandidato aron usa kanila pilion sa mga tawong madala sa katam-is sa ilang dila.

Alang ni Almendras buot niyang usbon ang dagway sa Digos sanglit wa kini kausaban sud sa 18 ka tuig.

"We are behind in terms of development so we need a change kay 18 years gud sila naglingkod diha," ni Almendras.

"He was our congressman in the first district but he has done nothing. After his term ended, wa na siya magpakita diri, he stayed in Manila unya karon mobalik lang og eleksyon," matud ni Penas nga nagtumong ni Almendras.

"Kung ilaha kung patudloon kung ako ba'y nagpahimo og dalan of course wala ko'y matudlo ana pero apil ko sa pagpa-approved sa mga pondo aron adunay programang inprastraktura dinhi," si Cagas kinsa wa sab magpa-alkanse human na-isyo nga wa siya'y nahimo isip sakop sa Sangguniang Panglungsod.

Samtang didto sa lungsod sa Sta. Cruz, Davao del Sur, subling nagtakos ang mga abogadong sila si Jerome Undalok ug incumbent Mayor Joel Ray Lopez.

Niadtong 2007, gipildi ni Lopez si Undalok mao nga karon hingpit na kining nagpasiatab sa ilang mga nahimo sa lungsod.

"Ang advantage lang nako niya kay wa siya'y (Lopez) nahimo unya sa panahon nga ako ang mayor daghan ko'g nahimo," ni Undalok nga ni-atake ni Lopez.

"Kanang istorya gud that is self-serving na. Ang atua ipakita nato sa tao kung unsa'y atong nahimo. Ang nahimo ana (Undalok) namalit ra na og bulldozer nga bulok," bawos ni Lopez.

Init na ang kampanya sa matag lugar sa probinsya mao nga gihagit ang katawhan nga motabang pagbantay alang sa malinawong eleksyon ug di magpadala sa mga pagpanghuraw sa ni bisan kinsang pulitiko nga naanad nga manghulga kanila.

Gihangyo sab ang mga supporters sa matag kampo nga dawaton dayon ang kapildihan sa ilang mga kandidato aron di na masamok ang kahapsay'g kalinaw sa probinsya. (Orlando B. Dinoy)