DESPERADO na sa kinabuhi ang usa ka 30 anyos nga ulitawo hinungdan nga nakahuna-huna na lamang kini sa paghunos sa iyang hinulamang kinabuhi, Biyernes..

Nailhan ang naghikog nga usa ka Zeny Estanel alyas 'Pogi,' traysikad driver ug molupyo sa dapit.

Usa ka Ronie Araneta, market guard sa Barangay Poblacion, lungsod sa Matanao, Davao del Sur, ang nakadiskubre sa patay'ng lawas ni 'Pogi' nga nagbitay sa usa ka abandonadong balay nga naa likod sa market site.

Dali nga nangayo og tabang si Araneta ngadto sa mga otoridad human nga makita ang lawas ni Pogi.

Sa paghiling ni Inspector Roberto Maja, hepe sa kapulisan, nasuta nga gihigtan sa biktima og upat ka metros nga kolor yellow nga 'nylon rope' ang iyang liog ug gihikot sab sa atop sa balay ang pikas tumoy niini.

Sumala ni Maja nga sulod mismo sa usa ka bakanteng kwarto sa balay gihimo sa biktima ang paghunos sa kaugalingong kinabuhi.

Mituskig na sab ang lawas ni Pogi dihang narekober sa mga otoridad.

Matud ni Maja nga way 'foul play' sa insidente sanglit sa pasiunang imbestigasyon, nasayran nga pila na ka adlaw ang milabay, nadismaya ang biktima sa dagan sa iyang kinabuhi.

Sumala pa nga emosyonal si Pogi pila ka adlaw tungod kay problemado sa salapi gawas pa nga gibiyaan kini sa iyang live-in partner.

Gidala na lang ang patayng lawas niini didto sa Angel Funeral Homes sa lungsod sa Bansalan, Davao del Sur.

Si Police Officer 3 Xelces Von Wycliff Famor, imbestigador sa kapulisan mao ang gitahasan sa paghimo sa imbestigasyon sa kamatayon ni Pogi.(Dondon Dinoy)