Presensya sa mga rebelde nasiplatan

Sunday, March 21, 2010

PADAYON ang gihimong pagpatrolya sa mga sakop sa 39th Infantry Battalion (IB) sa mga bukirang bahin sa lungsod sa Sta. Cruz, Davao del Sur human nasiplatan ang anino sa mga rebelde.

Giila sab sa militar ang napatay nga sakop sa New Peoples Army (NPA) nga mao si Ernesto Valdevieso, vice-commander sa front committee 51 sa mga rebelde.

Have something to report? Tell us in text, photos or videos.

Siya napatay di pa lang dugay dihang nahinagbo sa militar ang mga rebelde samtang nagpatrolya sila didto sa Sitio Gore, Barangay Sibulan sa maong lugar.

Nakuha sab sa kasundaluhan niadtong higayona ang M1 Garand ug mga bala niini nga iya sa namatayng NPA.

Si Lieutenent Colonel Lyndon Panisa, 39th IB commanding officer, nagkanayon nga wa na sila'y kumpiyansa sanglit hayan mohimo gyud og samok ang mga NPA ngadto sa tanang nilang kampo sa lalawigan aron adunay ikapanghambog sa adlaw sa ilang ika-41 nga anibersaryo karong Marso 29.

Dungan niini, ang Davao del Sur Provincial Police Office (DDSPPO) gitakdang makig-alayon sa kasundaluhan aron pakusgan ang intelligence monitoring sa komunidad aron di molampos ang mga dautang lakang sa mga rebeldeng komunista.

Gitakdang makigtigom sab ang pamunuan sa DDSPPO ngadto sa tanang hepe aron paghisgot sa seguridad sa probinsya karong nagkaduol na ang kalihukan sa mga rebelde.

Sa miaging tuig, nilampos ang mga rebelde sa pagpatay sa hepe ug tulo ka pulis didto sa lungsod sa Bansalan, Davao del Sur human ila kining gipaunan og biktimang ilang gipatay.

Nahitabo ang pagpamanhig samtang gikuha sa kapulisan ang namatay didto sa Sitio Balagonon, Barangay Managa, Bansalan, Davao del Sur.

Di na buot ang kapulisan nga masubli ang insidente mao nga igmat sila sa matag respondehang krimen.

Ang New Peoples Army mao ang kamot sa Communist Party of the Philippines.

Namugna kini niatong Marso 29, 1969, buot kining motukod og Maoist government dinhi sa nasud sukad kaniadto. (Orlando B. Dinoy)