HUGTANONG gidili sa dakbayan sa Digos ang pagbaligya og mga paboto atol sa pagsaulog sa Pasko ug Bag-ong Tuig ug tungod niini, ang kapulisan maghimo og seminar alang sa mga tawong buot mamaligya niini.

Nanawagan karon ang Davao del Sur Provincial Police (DDSPPO) ngadto sa tanan nga buot mamaligya og paboto sa tibuok lungsod nga moapil sa himuong seminar-briefing nga gitakda karong Nobyembre 18.

Si SPO3 Erich Von Requilman, labaw sa Firearms and Explosives Security and Guard Supervision (FSAGS) PNCO, nitaho sa Sun.Star Superbalita kagahapon sa buntag, nga himuon nila ang seminar didto sa DSSPPO grandstand, Miyerkules karong sunod semana.

Matud ni Requilman nga ang seminar alang ngadto sa mga lungsod nga wa nipasa og ordinansa nga nagdili sa pagpamaligya og pabuto.

Apan gidugang niini nga bisan mga taga siyudad sa Digos mamahimong moapil sa tigum.

"Bisan taga Digos, mamahimo gihapong moapil," niya.

Sa siyudad sa Digos, hugot nga gibarugan sa mga opisyal ang ilang giduso nga ordinansa nga way gitugtang mopabuto o mamaligya og paboto atol sa selebrasyon.

Apan, matud ni Requilman nga kinahanglang moapil gyud sa pagahimuong briefing ang tanang mga buot mamaligya og paboto aron makakuha sila og permit gikan sa Philippine National Police.

Gipasabot ni Requilman nga way si bisan kinsa nga makapamaligya og mga pyrotechnic ug firecrackers devices kun walay pagtugot sa kapulisan.

Dugang niya nga dakpon gyud ang mosupak sa Republic Act 7138 o nailhan sab nga An Act Regulating the sale, manufacture, distribution, and use of firecrackers and other pyrotechnic devices.

Dugang sa kapulisan nga usa sa ilang gidili nga ibaligya mao kadtong dagkong klase sa paboto sama sa Pla-pla, Super Lolo ug uban pa, gawas nga makabungog delikado sab kini nga gamiton. (Orlando B. Dinoy)