NAHAYBOL ang sakyanan nga iya sa Barangay Kapatagan, sakop sa dakbayan sa Digos dihang padung kini sa pagpatrolya palibot sa lugar nga miresulta sa pagkaangol sa tulo ka mga tawo.

Mga alas 9:30 sa gabii, Nobyembre 9 sa dihang padulong ang sakyanan sa Sitio Marawer, Barangay Kapatagan, kalit lang nga nawad-an og balanse ang drayber sa manibela nga miresulta sa aksidente.

Ang taho nga nahidangat sa Digos City Police Office (DCPO), nagkanayon nga gimaneho ni Barangay Tanod Mario Carmilopez ang sakyanang Kennedy (plate number SHD-495) diin sakay sab niya niadtong tungora sila si SPO3 Paulino Cabrillos ug Barangay Kagawad Santiago Morales Jr.

Gitaho nga miatras ang sakyanan ngadto sa ubos nga bahin didto sa tulay sa Purok 3, Sitio Marawer atol sa gihimong pagpatrolya.

Human nalimbuwad ang ilang gisakyan, nahiagom ang mga biktima sa mga samad ug pangos sa ilang kalawasan apan gidali kini paghatod didto sa Davao del Sur Provincial Hospital (DDSPH).

Hinuon, luwas ang mga biktima sa talandugong kahimtang.

Di pa masuta sa traffic section sa DCPO kung unsay hinungdan sa depekto sa maong sakyanan mao nga nahitabo ang insidente. (Dondon Dinoy)