Resulta sa gun ban

Thursday, January 28, 2010

Dating gawi gikan sa Commission on Election (Comelec) matag umaabot ang lokal o nasyonal eleksiyon ang pag-implementar og gun ban. Ug matud pa nila mas istrikto kaayo karon kon itandi sa nanglabay nga eleksiyon tungod kay "NO EXEMPTION". Matag politiko duha lamang ka bodyguard ang gitugotan nga magdala og armas.

Bisan ang mga sakop sa media walay gitugotan nga makadala-dala og armas niining panahona. Ang mga sakop sa PNP ug AFP makadala lamang og armas kon naka-uniporme ug may mission order. Sa atong dakbayan sa Davao, nagkatag ang mga checkpoints alang sa maong katuyoan. Pero nganong duna may daghang gipamusil patay sa mga armadong tawo.

Have something to report? Tell us in text, photos or videos.

Sa atong pagpaniid, daghan gihapon ang mga armas nga makalusot tungod kay mga sakyanan lang ug mga motorsiklo ang kanunay harangon sa mga militar o PNP.

Panahon sa martial law nga oso ang G.O. 66, daghang armas ang manglusot ngano?, tungod kay manaug man ang tawo nga may dalang bakal gikan sa sakyanan kon may mga checkpoints sa unahan unya mobaktas paglampas sa checkpoint mosakay na sad og laing sakyanan.

Mas maayo tingali nga isugyot nato nga mag-body search ang mga miltar o PNP bisan sa mga tawo nga nanggibaktas para gyud walay lusot ang mga badlungon.

Labaw sa tanan dunay magpatrolya sa atong mga kabaybayonan, dili lang sa atong mga kadalanan. Sukad niadtong Enero 10 nga maoy pag-implementar sa gun ban upat na ka tawo ang gipusil dinhi sa atong dakbayan.

Walay kapuslanan ang kampanya sa gun ban kon daghan gihapon ang mga tawo nga mamatay pinaagi sa pagpusil. Walay magbuot sa Comelec kon hugtan pa nila ang paghigpit sa pag-inspeksyon kay kon yano ra kaayo nga makalusot kining mga tawhana nga magdala-dala og armas, unsa pa kaha ang mga politiko nga dunay tinagoang private army aron ilang ipalikidar ang ilang mga kaatbang sa politika ilabina kon kini pildihunon niining eleksiyona.

Paminawa ang "KONTRA BALANSE" sa radyo DXKT, 1071 sa dial sa inyong mga radyo, alas 6 hangtud sa alas 7 sa buntag, Lunes hangtud sa Sabado. Ug ang programa sa TV Channel 9, "KONEKSYON", kada Biyernes, alas 7 hangtud sa alas 8 sa buntag.8 sa buntag.