Ni Ely M. Luciano
Magprangkahay Kita

SI kanhi Congressman Roger Sarmineto sa District 1 sa Comval gikabaniog nga modagan pagka kongresista sa piliay sa 2010 sa samang distrito.

Tungod sa maong plano, adunay mga tawo nga nagduha-duha kun wa pa ba siya nakalimtan sa mga molupyo sa distrito nga iyang gialagaran kaniadto. Ang pangutana--duna pa ba siya'y balikan?

Sa buntag niadtong Martes, Hunyo 09, nag-kape kami ni Comval ex-governor Joe Caballero ug isip usa ka girespitong politiko ug abogado, akong gipangutana kaniya kining butanga.

Sumala ni JoeCab dako kaayo ang tsansa ni Sarmiento nga modaug bisan kinsa ang iyang kaatbang, pananglit tinud-on niya ang iyang plano nga modagan.

Premiro, sumala ni JoeCab, ang pangalan nga Sarmiento lisud makalimtan sa katawhan sa Comval.

Ikaduha, si Sarmiento nailhan kaayo nga dili kurap kay sud sa panahon nga siya nahimong kongresista wa gayud niya gigamit ang salapi sa mga magbubuhis alang sa iyang personal nga kaayohan, dugang ni JoeCab.

Ikatulo, sa panahon ni Sarmiento girespito siya sa iyang mga kauban sa kongreso, sumala sa kanhi gobernador.

Matud ni Caballero nga kun qualification man lamang usab ang hisgutan, lisud pildihon si Sarmiento gawas nga may taas na siya nga kasinatian isip magbabalaud.

Ang kongresista karon sa district 1 mao si Congressman Manuel "Way Kurat" Zamora apan gumikan kay last term na kini niya, mopahuway usa siya ug ang padaganon mao ang iyang anak nga si board member Maricar. Laing gidungog nga modagan sa maong distrito mao si vice governor Ramil Gentugaya.

Piliay

Daghang mga opisyal naniguro nga adunay piliay sa 2010. Pruyba niini mao ang P11.3 bilyones nga kantidad nga gigugol sa kagamhanan alang sa automated election. Apan ang mind-boggling dinhi kun butang nga makapakutaw sa utok kun unsa ang piliay--presidential ba o parliamentary?

Amerika

Sa Amerika, pipila lang ka oras human sa piliay, mahibaw-an na kinsay midaog nga mga kandidato. Dinhe sa Pilipinas, dangtan pa og pipila ka adlaw, buwan ug tuig una mahibaw-an kinsay nidaug.

Hangtud karon daghan gihapon ang supak nga gamiton ang automated machine sa piliay sa 2010 tungod sa rason nga dili kini fraud-free. Duna gihapo'y tikas, sumala pa.

Apan kun ipadayon ang 'manual' nga paagi daghan gihapon ang moyawyaw tungod sa panlimbong. Unta magtuon na sa pagbag-o ang mga tikasan nga mga politiko. Ug aron sila makabatun og leksiyon, di botohan.

Flag

Sa miaging pagsaulog sa Independence Day, Hunyo 12, wa na kaayo'y mga sakyanan nga nagbutang og Philippine Flag. Ngano kaha?