Roldan: 4Ps tutukan sa Davao

Tuesday, September 7, 2010

USA sa mga ligasiya nga gibilin sa kanhing pamunoan ni Presidente Gloria Arroyo mao ang Pantawid Pamilyang Pilipino Program o 4Ps. Usa kini ka estratehiya sa nasudnong kagamhanan sa pagwagtang sa kapobrehon pinaagi sa paghatag og cash grants ngadto sa pinakamayukmok nga sakop sa katilingban ubos sa ilang pagtamod sa mga kalagdaan o conditionalities sama sa pagpre-natal sa mga buntis, pagtambong sa mother's classes, pagpabakuna ang ilang 0-5 anyos nga mga anak ug pagpatungha sa mga bata.

Buot niining matuman ang Millennium Development Goals sa natad sa edukasyon, panglawas og nutrisyon sa mga ginikanan ug sa bata nga nagpangidaron og 0-14 ka tuig.

Have something to report? Tell us in text, photos or videos.

Post your reaction to the Manila hostage crisis

Gipunting ang 20 ka pinakapobreng probinsiya sa nasud basi sa 2006 Family Income and Expenditures Survey (FIES) ug ang 2003 Small Area Estimates (SAE) sa NSCB. Nahiapil ang Davao sa maong programa nga gilangkuban sa 39 ka barangay diin 12 niini anaa sa District 1, 19 sa District 2 ug 8 sa District 3.

Sa talaan sa CPDO, nikabat og 3,465 ka pamilya ang nabenepisyohan niining maong programa sa dakbayan. Gituohan nga moabot pa og 50 ka mga barangay ang mahiapil sa maong programa.

Matag pamilya mahatagan og tag P500 matag bulan o P6,000 sa usa ka tuig alang sa gasto sa panglawas ug nutrisyon, P300 matag bulan sab o P3,000 matag bata sa 10 ka bulan alang sa pagpatungha sa tulo ka mga bata.

Sa kinatibuk-an makadawat sila og P1,400 matag bulan o P15,000 matag tuig sud sa 5 ka tuig gikan sa 4Ps pinaagi sa Landbank Cash Card o sa Over-the-Counter (OTC) nga transaksyon.

Mao usab kini ang gitutukan sa UNICEF sa ilang Country Programme for Children (CPC) 6 Extension Programme nga motabang nga molampos ang 4Ps pinaagi sa mga pagbansay sa mga ginikanan, komunidad ug mga trabahante alang sa 4Ps, pagpalig-on sa iyang estraktura ug pagdokumento sa iyang gipanghimo.

Nagtinabangay ang mga ahensiya sa gobyerno nga mahilambigit niini sama sa DepEd, DOH, DILG ug sa opisina ubos sa local government unit.

Gawas sa Davao City, mahatagan usab ang munisipyo sa Manay, Caraga, Tarragona sa Davao Oriental, Malita, Sta. Maria, Don Marcelino, Jose Abad Santos, Sarangani sa Davao del Sur, Laac sa Compostela Valley ug Talaingod sa Davao del Norte.

Gitarget nga moabot og 700,000 hangtud sa 1.3 milyon nga pamilyang kabus ang makadawat niini gikan sa badget sa gobyerno nga sobra P10B sa kasamtangang tuig.

Gisugdan kining maong programa niadtong 1998 sa panahon ni kanhi DSWD Secretary ug karon nibalik na usab sa puwesto nga si Dinky Soleman.

Gibalita karon lang bag-o nga niabot na ang kuwarta nga gihulam sa administrasyon ni PNoy sa ADB ug nahiapil niini ang badget para sa 4Ps.

Apan dili tanan nakagusto sa maong programa. Ang Akbayan Partylist nagbatikos sa maong lakang nga pa-pogi points ra daw sa Aquino government ug mas maayo nga idugang na lang sa social services sa mga ahensiya sa gobyerno kaysa manghatag og cash ngadto sa pamilya.

Para kanako, maayo na lang nga may kongretong madawat ang tawo nga hinabang gikan sa gobyerno kaysa masulod sa bulsa sa mga kurakot.