Ni Emmanuel C. Roldan
Nota Bene

ANG kakulang o ang paghinobra sa komunikasyon maoy usa sa mga nag-unang hinungdan sa away. Komplekto sa relasyon sa balay, trabaho, negosyo, komunidad, ug mga nasud. Ato kining gitawag nga pag-inambitay, pagkukabildo, ug pagbinayluay og pulong.

Apan bisan unsa pay tawag nato, usa ray iyang katuyoan nga mao ang pagsinabtanay. Pwedeng adunay komunikasyon ang magkaaway apan wala makab-ot niini ang iyang katuyuan nga magkasinabot. Ang AFP, NPA, ug MILF puwedeng magbinayluay og pulong apan wa makab-ot ang tinguhang magsinabtanay nga ihunong ang pinusilay kay way maayong kapaingnan ang giyera. Busa gihisgutan ang komunikasyon sa pre-cana seminars sa simbahan ug sa gobyerno alang sa mga kaslunon aron ila kining magamit sa pagpalig-on sa ilang kinabuhing minyo.

Adunay istorya nga nahimong kataw-anan apan naghulagway sa matuod nganong paltos ang grupo nga magsinabtanay. Pila ka siglo nga nilabay ang Santo Papa nihimo og kamanduan nga magpabunyag sa Katoliko ang tanang Judeo nga nagpuyo sa Italy. Nangasuko ang komunidad sa Judeo kay di nila masalikway ang ilang tinuohan.
Tungod niini, nihatag og lugway ang Santo Papa ug nihagit nga maghimo sila'g debati. Magpabilin ang Judeo sa Italy kung modaug sila ug kung mapildi magpabunyag sila o mopahawa sa lugar. Nangita gidayon ang kadagkuan sa Judeo kung kinsay iharong nila sa Santo Papa ug ilang napilian ang usa ka tiguwang nga rabbi. Apan tungod kay dili kahibalo sa pinulongang Italyano ang rabbi ug di sab kabalo sa Yiddish ang Papa, ilang gikasabutan nga himuon kining silent debate. Sa adlaw nga gitakda, nag-atubang sila sa paglingkod. Giisa sa Papa ang iyang tulo ka tudlo. Mibalos usab ang rabbi sa pag-isa sa iyang usa ka tudlo. Gisaka pagbalik sa Papa ang iyang tudlo ug iyang gituyok-tuyok sa kalangitan. Mibalos na usab ang rabbi ug iyang gitudlo ang yuta. Pagkahuman, gikuha sa Papa ang hosteya ug bino ug gikuha usab sa rabbi sa iyang mansanas nga dala. Dali-daling mitindog ang Papa ug nagdeklara nga midaug na ang Judeo. Gialirungan dayon sa mga cardinal ang Papa ug nangutana kung unsay nahitabo. Matud pa sa Papa nga wa siyay bawot sa rabbi.

"Giisa ko ang tulo ka tudlo isip pagpaila nga 3 ka personas ang Dios apan gipasidan-an ako nga 1 ra ang Dios nga ato usab nga gituohan. Gitudlo ko ang kalangitan aron masayran nga anaa sa palibot ang Dios apan gipahinumduman ako nga ang Dios anaa usab dinhi karon sa atong taliwala. Gikuha ko ang pan ug bino aron ilang masayran nga gipasaylo na kita pinaagi sa lawas ug dugo ni Kristo apan gipahinumduman ako sa sala nga panulundon gikan nila ni Adan ug Eba."

Sa laing bahin, gialirungan usab ang rabbi sa mga lideres aron masayran nganong nidaug sila. "Wa ko kahibalo" matud pa sa rabbi. "Gisulti sa Papa nga 3 na lang kita ka adlaw diri sa Italya busa gipakitaan ko siya'g dirty finger. Ingon niya limpyuhan nila sa Judeo ang Italya ug gisultihan ko siya nga magpabilin kita dinhi. Gikuha niya ang iyang merienda busa gikuha ko usab ang akong balon aron kan-on.