Roldan: Pasig Eco-Tourism Park gilamok

Sunday, September 5, 2010

UBAY-UBAY nga mga local government units (LGUs) nagtukod og mga eco-tourism parks aron makadugang sa ilang pundo pinaagi sa turismo.

Nakasuroy ako sa pipila sama sa eco-park sa Cagayan de Oro, Misamis Occidental ug karong bag-o lang didto sa Passig Eco-Tourism Park sa Barangay Bato, Sta. Cruz, Davao del Sur. Kung di ko masayop mga 2 pa ka tuig kining maong park ug nahimo ganing isyu tungod kay ang provincial government man hinuon ang nagdumala imbis nga ang munisipyo sa Sta. Cruz. Nindot kaayo ang lugar kay ilang giabunohan og puting balas ang usa ka gamayng isla taliwala sa dagat og gibutangan og mga pasilidades alang sa mga mobisita.

Have something to report? Tell us in text, photos or videos.

Post your reaction to the Manila hostage crisis

Mosakay ka og bangka gikan sa baybayon paingon niining maong isla nga gilibutan usab sa mga nagbuhi og guso ug lato.

Sa kinatibuk-an maayo kini kay gipalambo niini ang turismo ug maatiman ang kinaiyahan.

Apan sa laing bahin, daghan pang ayuhon ang maong proyekto. Kinahanglang magtuon sila sa paagi sa mga negosyante nga kahibalo unsaon pagdani sa mga bisita aron modayo didto. Sama pananglit sa parking space. Dako ang lugar alang sa ilang parking space apan unsang hitaboa nga kinahanglan pang moadto sa barangay gym aron mo park.

Tingale moabot og dul-an usa ka kilometro pa ang lakton gikan sa gym hangtod sa dunggo-anan sa bangka. Dili nimo pwedeng palakton niining gilay-ona taliwala sa kainit sa adlaw ang bisita aron lang molantaw sa eco-park.

Ingon pa sa nagbantay nga huyang pa daw ang yuta nga agian busa nagplano silang mobutang og mga multi-cab nga maoy sakyan sa mga bisita. Kanus-a pa?

Ang nakaparat lang kay may pipila ka sakyanan nga makitang nakaparada sa giingon nilang huyang nga yuta. Ikaduha nga usbunon mao ang kawalay sistema sa pagkuha og bayad alang sa entrance, bangka og sa payag sa isla.

Bisan kinsa lang ang mosinggil og walay resibo og ticket nga ihatag.

Maglalis pa ang bangkero ug sa trabahante sa probinsya sa pagpasakay sa pasahero.

Magsiningkahay sab ang driver sa bangka ug sa iyang konduktor kay di daw kahibalo.

Ikatulo, gisultihan ka daan sa bangkero nga makauli lamang ang mga bisita sa mga alas 3-4 sa hapon kay mosanggad kuno ang ilang bangka kung sayo.

Wa sab silay gisugyot sa angayang buhaton kung enkaso may bisitang mouli dayon o may emerhensiya nga mahitabo. Ikaupat nga usbon mao ang pagpasulat sa logbook sa tanang bisita paghiabot sa isla.

Ambot kung nganong buhaton pa kini sa usa ka resort.

Kung kinahanglan gayod kini, unta didto pa sa baybayon sa wa pa mosakay sa bangka.

Ikalima, maot ang pasilidad sa lugar. Usa ra ka CR ang magamit kay gisirad-an ang usa nga sa akong tan-aw daut sab. Nagbara pa ang drainage niini nga mobaha inig kaligo. Mao diay nga way daghang maligo didto bisan weekend.

Busa gihagit namo ang provincial government nga ayuhon ang pagdumala niini.
Kung di kaya sa gobyerno, pwede tingaleng ipa-operate og private sector aron mas monindot.

Hinumdumi nga moadto ang bisita aron malipay ug dili aron maaburido sa inyong way ayong serbisyo.