Ni Emmanuel C. Roldan
Nota Bene

UBAY-UBAY na ang akong natabangan nga mga Parents, Teachers, and Community Associations (PTCAs) kalambigit sa ilang papel sa pag-ayuda sa eskwelahan. Gihimo kini nako isip organizational consultant sa usa ka dako nga national NGO.

Sa akong nakita, dako kaayo ang mahimong tabang sa mga PTCAs kay sa mosugot kita o sa dili, way ikasarang ang atong gobyerno sa pag-atiman sa publikong eskwelahan sa nasud. Sama sa naandan, atong madunggan ang rason nga kapus sa badyet, walay appropriation, dili prayoridad, walay pundo, ug uban pa gikan sa mga opisyal sa DepEd.

Bisan tuod ang edukasyon ang may pinakadakong pahat sa nasudnong badyet, pinakagamay gihapon kini sa budget per pupil ratio. Mas taas pa niini ang bayad sa interest sa atong utang sa gawas sa nasud, badyet sa depensa, military, ug intelligence.

Apan sama sa tanang social institutions ilabi na kung may hisgutanang kuwarta, dili malikayan nga may balitang dili maayo sa PTCAs. Kurakot diri ug kurakot didto kay lagi abi sa mga nagdumala nga wala silay responsibilidad ngadto sa mga kabataan ug sa ginikanan nga nagpasingot aron magpatungha sa ilang mga anak.
Matuod kining nahitabo apan para kanako dili kini igong rason nga wagtangon na ang panaghugpong sa PTCA sa tibuok nasud. May daghan pa kaayong PTCAs nga maayo ang pagdumala ug angayang daygon nato ug sa gobyerno sa ilang ayuda ngadto sa eskwelahan.

Kung atong tukion, papel baya sa gobyerno ang pag-atiman sa mga eskwelahan. Busa angayang dawaton, daygon, ug pasalamatan ang bisan unsang tabang nga mahatag sa komunidad ngadto sa eskwelahan. Kung wala ko masayop, ang partisipasyon sa komunidad ngadto sa PTCA nagsumikad sa R.A. 7160 o ang local government code diin gihatagan og dugang kusog ang local government units ug ang katawhan sa pag-apil sa local governance, apil na niini ang mga tulunghaan.

Natay-og ang PTCA tungod sa D.O. 54 nga nagbalik sa PTCA ngadto sa PTA nga maoy iyang karaang estraktura. Gipaguwa kining order tungod lagi sa balitang pagkuyanap sa daghang abuso sa mga opisyal sa PTCA.

Matud pa sa usa ka principal nga mas maayo nga mga magtutudlo lang ug mga ginikanan o guardians ang maapil sa grupo aron walay sapat.

Moguwa daw ang abuso kung moapil ang pipila ka personalidad sa katilingban nga adunay kaugalingong agenda. Apan alang kanako dili ang konsepto sa PTCA ang problema kundili ang mga tawo nga nagpadagan ug sa huyang nga palisiya niini. Bisan pa man kon puro magtutudlo ug ginikanan ang PTA kung mangtas ug hilabtanon ang principal o ang napiling presidente ug treasurer, bungkag lampinig gihapon ang grupo. Gani giapil ang komunidad sa PTA tungod gihapon sa susamang kahimtang nga dili maayo ang pagdumala sa PTA ug sa iyang panlalapi.

Giapil ang komunidad aron maoy mopatunga unta sa mga bangi tali sa mga magtutudlo ug mga ginikanan ug sa abuso nga ilang nahimo.

Para kanako, PTCA man o PTA, way kapadulngang kaayohan sa eskwelahan ug sa kabataan mintras anaa pa ang personal interest, pagpanglimbong, pagkahakog, ug pagkawalay pagbati sa lideres sa PTCA ngadto sa uban.