Roldan: Sangguniang Kabataan pakusgan

Friday, September 3, 2010

HAPIT na pod ang bugnong lugaynon sa barangay. Kung ang Commission on Election ang pa-istoryahon, andam na sila kay mao man kini ang gimando sa balaod. Apan kung ang Kongreso ug Senado ang atong paminawon, mora'g naay posibilidad nga maoktaba kini sa sunod tuig aron daw makadaginot ang nagkagidlay nga panudlanan sa nasud o kaha masenkronisa kini sa nasudnong piniliay sa 2013.

Kung si Vice President Binay pa ang pagbut-on, wagtangon na niya ang barangay council ug siyempre ang SK kay nagdugangdugang lang sa gasto ug gigamit lamang sila sa mga hiwing politiko.

Have something to report? Tell us in text, photos or videos.

Post your reaction to the Manila hostage crisis

Medyo uyon sab si PNoy nga tun-an sa DILG ang pagwagtang sa SK ug usa na lamang ang representante sa mga kabataan sa barangay.

Sa kasamtangan, ang SK chairperson mao ray sakop sa Barangay Council ug dili ang pito niya ka SK kagawad.

Sa tinuod pipila lang ka bulan nga mora'g aktibo ang mga SK kagawad sa barangay kay sa kadugayan pul-an na sila sa pag-apil ug mora'g sabon nga mahilis busa wa nay gustong modagan pa sa SK.

Ang usa sa mga mulo sa mga SK kagawad mao nga di na sila makasesyon tungod sa eskwela. Tawagon nalang sila sa SK chairperson kung may hinimo nang daan nga resolusyon nga gikinahanglan nilang pirmahan.

Ang ikaduha mao nga ang SK chairperson lang ang may honorarium ug kon makalider sila og way pagbati sa iyang mga kauban, igo ra sa merienda ang ilang madawat.
Ang ikatulo nga mulo nga akong nasagap sa SK mao nga ang Barangay Council ug ang kapitan maoy magbuot unsaong paggamit sa ilang badyet.

Magamit kini usahay sa paggasto sa lakbay-aral, sa gasto sa araw ng barangay, dugang pangsuweldo ug uban pa imbis nga para sa proyekto ug programa sa kabataan.

Busa ang pinakasayon na lamang ang ilang buhatong proyekto sama sa pagpahimo og goal sa basketball ug mga street signs ug ang pagpalit og cellphone aron adunay handumanan.

Sa RA7160 o ang local government code of 1992 nag-ila sa papel sa kabataan sa kalambuan sa katilingban.

Ang UN Convention on the Rights of the Child nag-awhag usab sa Estado sa pagpatuman sa participation right sa mga bata. Ang SK maoy dakong ehemplo sa pagpatuman niining maong katungod sa mga bata sa Pilipinas busa usa ako sa mosupak nga tangtangon kini sila sa estraktura sa kagamhanan.

Way laing maipakita ang gobyerno sa Pilipinas nga kongkretong timailhan nga nisunod sila sa Convention kabahin sa partisipasyon sa mga bata kondili ang SK lamang.

Sa tinuod, ang dunot nga sistema sa politika sa nasud nga gidumalahan sa mga Sangguniang Karaan o Sangguniang Kakurakotan maoy nakabahong basura sa SK.

Kung unta husto lang ang giya ug suporta sa kagamhanan sa ilang buhaton ug dili manghilabot ang Barangay Council, hayan nga mahimong dugokan ang SK sa maayong ideya, aktibong partisipasyon og pag-umol sa mga bata sa maayong gawi, batasan ug bag-ong nawong sa politika sa nasud.

Nituo ko nga ang pagpanghilabot sa mga katigulangang politiko sa lihok sa kabataan maoy nakapawala nilay gana sa pagsalmot sa kaugmaran sa barangay.