KUNG naglumba ang bagyo nga mohapak sa atong nasud, naglumba usab karon ang mga kandidato nga mosabak sa bugnong lugaynon karong 2010.

Dinhi sa atong nataran, makita na ang kisaw sa mga kandidato, gikan sa pagplastada sa ilang mga hulagway sa kabarangayan hangtud sa mga ordinaryong panagtapok sa katawhan.

Kung adunay mga TV-evangelists, mitumaw sab karon ang mga TV-politicians diin ilang gigamit ang telebisyon alang sa pagserbisyo sa katawhan ug sa pagpaila kanila. Siyempre, pabor ang dugay nang daan sa politika kay mosamot ang ilang "exposure" kaysa mga bagohan pa. Gawas nga mahal ang gasto pagmentinar sa maong programa nga sagad makita lamang sa cable TV, dili sab basta-basta ang pag-imbitar sa mga tawo nga ilang hinabi-on sa matag episode.

Kung kaniadto ang mga politiko mag-ampo nga imbitahon sa mga TV stations, karon sila na mismo ang moimbita kung kinsay pasultihon sa ilang programa. May usa pa gani ka programa sa iladong politiko nga mora'g siya nay tag-iya sa station kay ang iyang gibuhat lang ang kanunay isalida. Para kanako OK lang ang maong kalihukan, pangserbisyo man o taktika sa politika kay kabahin kini sa sistemang demokrasya sa nasud. Sa maong sistema, ang tanan puwedeng buhaton kung way gilapas nga balaod, tradisyon o kultura sa nasud.

Sagad sa mga TV-politicians kay mga tang-an na sa politika ug may ikaharong gayud sa katawhan pinaagi sa ilang hataas nga kasinatian sa politika ug sa kadaghan sa mga tawong ilang gikahibalag.

Dako usab ang tabang sa ilang TV program sa pagpasabot sa katawhan sa mga panghitabo sa dakbayan, sa nasud ug sa tibuok kalibutan. Apan labaw sa tanan, ilang gipahibalo sa katawhan ang ilang agi sa politika ug sa ila pang buhaton kung anaa sila sa puwesto.

Pabor gayod kanila ang maong programa samtang luoy ug alaut lamang ang mga mogitibay pa nga politiko nga way ikasarang sa pagpaila sa ilang kaugalingon. Unta dili lang pang-pogi points in aid of election ang mga TV programs sa atong mga politiko.

Suporta batok SE

Niguwa na ang concluding observation sa United Nations Committee on the Rights of the Child (UN CRC) sa 3rd and 4th country report sa Pilipinas sa iyang implementasyon sa Convention on the Rights of the Child. Bisan tuod nga gidayeg sa UN ang mga lakang sa kagamhanan sa pag-atiman sa mga bata, naguol kini sa padayong pagpamatay o summary execution.

Gitaho nga 1 sa matag 9 ka mga biktima sa SE kay bata busa nanawagan kini sa gobyerno nga pakusgon ang kampanya batok niini ug iduso na ang daghang nag-ung-ong nga mga bills alang sa kalambuan sa bata.

Anaa sa listahan sa UN mao ang Anti-Corporal Punishment Bill, Anti-Child Pornography Bill, Foster Parenting Bill ug uban pa.

Gawas niini, naggahin usab ang European Union og salapi aron pagpakusog ug pagpalig-on sa mga ahensiya sa gobyerno sama sa DSWD, CHR ug civil society groups nga may programa batok SE.

Tinuod nga sagpa sa nawong kining gibuhat sa UN ngadto sa kasamtangang gobyerno nga maayo ra sa sulti apan di makita sa buhat.