Ni Emmanuel C. Roldan
Nota Bene

MAGSUGOD ang sesyon sa konseho, senado, ug kongreso pinaagi sa usa ka pag-ampo. Halos tanang pormal ug ordinaryong panagtigum magsugod usab sa pag-ampo nga unta magmalampuson ang ilang gimbuhaton.

Dunay higayon nga pagkahuman sa pag-ampo nagsinukmagay gidayon ang mga opisyal o ang nagtigum tungod sa kapungot sa ilang kontra. Mora'g di makaya ang pag-ampo sa pagpugong sa ilang gihambin nga pagbati.

Usa ka pinasaheng pag-ampo ang gihimo ni Rev. Joe Wright nga gidapit sa pagsugod sa session sa Kansas Senate sa America. Human sa iyang pag-ampo, daghang senador ug mga bisita ang nangguwa kay naigo sa iyang pag-ampo. Giulan siya og ang iyang simbahan sa daghang batikos gikan sa mga politiko ug mga opisyal sa gobyerno. Apan daghan usab nga nalipay sa iyang gibuhat ug ang kopya sa iyang pag-ampo nikuyanap sa daghang lugar sa America.

Gisulayan nako kini og paghubad sa atong pinulongang Cebuano aron masabtan. Adunay mga pulong nga lisod hubaron nga gipabilin nako sa English ug unta inyo gihapon kining masabtan.

Ingon niini ang iyang pag-ampo: "Langitnong Amahan, niatubang kami karong adlawa sa imong atubangan aron sa pagpangayo sa imong kaluoy ug aron mangayo kanimo og direksyon ug giya. Kahibalo kami sa imong pulong nga nagkanayon, 'Alaut kadtong nagtawag sa dautan nga maayo,' apan mao kini ang among gibuhat. Nawad-ad kami sa among spiritual equilibrium ug gituis namo ang among prinsipyo sa kinabuhi. Among gipahimuslan ang kabus ug gitawag kini namo nga lottery. Gipremyohan namo ang katapulan ug gitawag namo kini nga tabang sa kabus. Gipangpatay namo ang mga wa pa matawong bata ug gitawag namo kini nga choice. Gipamusil namo ang mga abortionists ug gitawag namo kini nga makatarunganon. Gibaliwala namo ang pagdisiplina sa among kabataan ug gitawag namo kini nga pagtukod og self-esteem. Nagpahimulos kami sa gahum ug gitawag kini namo nga politika. Gipangawat namo ang butang sa uban ug gitawag kini namo nga ambisyon sa kinabuhi. Gihugaw-hugawan namo ang hangin ug palibot sa malaw-ayng buhat og pornograpiya ug gitawag kini namo nga katungod sa gawasnong pamahayag. Among gibiay-biay ang mga kinaiya ug prinsipyo sa among mga katigulangan ug gitawag kini namo nga kaamguhan.

"Siksika kami, O Ginoo, ug hibal-a ang among mga kasingkasing karong adlawa. Limpyohi ug ipalingkawas usab kami, O Ginoo, gikan sa among mga kasal-anan. AMEN."

Pila kaha sa atong mga lideres ug politiko nga naigo sa isog nga pag-ampo ni Pastor Wright? Pila pod kaha sa atong mga lider sa simbahan ang makahimo og susamang lakang sa pagbatikos sa hiwing hinimoan sa mga anaa sa gahum ug di masilaw sa ilang sapi ug suburno?

Karong kusog na ang kalihukan batok Con-Ass, makakita ug makadungog na usab kita sa mga pag-ampo sa mga sakop sa simbahan ug sa mabagang duot sa katilingban nga nangayo'g giya gikan sa atong Ginoo.

Unta sa makausa pa madungog kining tanan sa Ginoo ug manuhuptuhop unta sa kasingkasing ug balatian sa mga hingtungdan.

Ginaingon nga way tig-ang batong bantilis sa kadautan nga dili mabuak sa makanunayon ug way puas nga tinulo sa tubig sa kaayo ug kamatuoran.