USA ka sakop sa Civilian Auxiliary Unit didto sa Barangay Saliducon, lungsod sa Sta. Cruz, Davao del Sur, gidakop sa kapulisan human nga gikatahong nanghasi sa ilang lugar.

Nigawas ang taho nga hubog ug armado niadtong higayona ang CSU nga si Danilo Durano, biyudo, nagpuyo sa dapit ug nagmaoy sa usa ka tindahan nga iyang giimnan sa milabayng gabii.

Si Police Senior Insp. Alfredo Santillana sa Sta. Cruz Police Station dihang nakadawat sa alarma, niadto dayon sa lugar kuyog ang iyang mga sakop ug didto naabtan nila ang suspek nga hubog.

Dihang gihiling ang bag sa suspek nga nagsul-ob pa og camouflage nga uniporme, nakuha gikan kaniya ang pito ka mga buhing bala sa kalibre .45, upat ka buhing bala sa .22 kalibre sa revolver ug buhing bala sa 12 gauge shotgun.

Apan, suma ni Santillana, way silay nakitang dalang armas ang suspek gawas sa mga bala.

Nakurat sab ang kapulisan human nakuha gikan sa posisyon niini ang gituohang agod-agod kon labaw'ng nailhan nga anting-anting.

Gipasabot dayon sa kapulisan ang constitutional rights sa suspek nga gilatid sa R.A. 7438 una kini gisikop.

Nasuta sa kapulisan nga nag-atubang na diay og daghang reklamo ang suspek tungod kay sa giingong batasan na niini nga paghimo og kasamok sa higayon nga mahubog.

Nag-atubang sab kini og reklamo sa kasong pagpanghulga, direct assault sa usa ka barangay opisyal didto sa silingang barangay sa Tuban ug uban pang susamang reklamo gikan sa mga tawong gi-agrabyado niini.

Ang otoridad sa lugar nihan-ay dayon sa kasong paglapas sa gi-amyendang probisyon R.A. 8294 gikan sa PD 1866 kun illegal possession of ammunition or explosives. (Dondon Dinoy)