Ni Ely M. Luciano
Magprangkahay Kita

SA Senate committee on youth, women, and family relations hearing nga gidumala ni Senador Jamby Madrigal niadtong miaging Huwebes, gitin-aw ni Dr. Hayden Kho ang tanang mga akusasyon kaniya bahin sa giingong sex scandal.

Daghang mga pasangil kaniya, iyang giangkon. Gidawat niya ang iyang mga sala ug nagsulti nga iya kadtong gibasulan.

Si Katrina Halili usab kinsa maisugong mitambong sa hearing, masub-anong nagtug-an nga sugod pa niadtong Pebrero nawad-an na siya ug trabaho, hangtud iyang endorsement nahanaw kaniya tungod sa sex scandal nila ni Hayden.

Apan samtang maikagon ako nga naglantaw sa proceedings sa Senate hearing, akong namatikdan nga si Senador Bong Revilla dili preparado sa iyang mga pangutana. Bisan kadtong obvious nga butang iya pang gipangutana.

Usa sa iyang pangutana ni Katrina mao kini: "Katrina, ano ang masasabi mo ngayon na nagkita na kayo ni Dr. Hayden Kho?"

Angay pa ba kini ipangutana nga nasayud man ang tanan nga suko gayud si Katrina kang Hayden? Ang-ang man sab kun mosulti si Katrina nga "Natutuwa ako."

Unta mangutana si Revilla sa iyang abogado o kaha sa iyang staff unsay mga pangutana nga may unod aron di siya mahalata. Migawas hinuon nga mas bright kaniya si Hayden.

---
2 ka pulis di masaligan

Duha ka mga pulis sa dakbayan sa General Santos ang nalambigit sa pagpanamastamas sa usa ka babaye nga police job applicant.

Usa sa mga pulis gi-akusar sa paglugos sa babaye samtang ang laing usa gireklamo og acts of lasciviousness.

Dihang naipit na ug nakatimaho nga siguradong mapriso siya, kadtong P01 nga milugos sa aplikante pagka-pulis nakig-areglo ug nihanyag dayon nga pakaslan ang iyang nabiktima.

Gisibog na sa babaye ang reklamo apan labing maayo karon nga tangtangon sa serbisyo ang duha ka manyakis nga mga pulis kay di masaligan.

----
DCWD way ayo

Daghang mga molupyo sa pipila ka mga lugar sa dakbayan sa Davao wa kabantay sa water interruption niadtong Domingo, Mayo 31. Tungod niini, daghan ang nag-antus kay way tubig sa halus tibuok adlaw.

Unsaon man gud ning Davao City Water District di maayo ang management.

Unta sundon nila ang gibuhat sa Davao Light and Power Company. Ang Davao Light tungod kay adunay naka-schedule nga power interruption niatong Mayo 31, nanghatud sa matag panimalay og notisya nga gipermahan ni Ross Luga aron makapangandam ang mga tawo. Ang notisya gihatud Biyernes pa gani.

Nagtuo siguro ang DCWD nga pinaagi sa pag-anunsiyo sa usa ka sibyahanan sa radyo nga maoy ilang suki, mapahibawo na ang tanang mga molupyo. Way klaro nga management.