AMBOT kung unsay nasulod sa hunahuna ni Senador Panfilo "Ping" Lacson sa pagpanawag niya'g tax boycott sa kasamtangang administrasyon.

Sa iyang privilege speech sa hawanan sa senado, giyagyag niya ang tanang kahiwian sa gobyerno. Tungod niini nisugyot siya nga di mobayad og buhis ang katawhan aron segurado nang mahugno ang gingharian sa harang gangis nga nagdala'g dugang kalisod sa kabus niyang katawhan. Susama kini sa gipanawagan sa yellow Friday movement sa panahon ni Cory sa dihang buot na sa katawhan nga moikyas gikan sa kamot ni kanhi Pres. Marcos nga nakapurdoy sab sa nasud. Civil disobedience ang gipanawagan karon ni senador Ping, lakang nga nisaler kaniadto hangtud nga napukan gayud si Marcos pinaagi sa people's power revolution didto sa EDSA. Gidala sa katawhan ang ilang kapungot ngadto sa kadalanan dungan sa ilang wala pagbayad og buhis ug pagpalit sa mga baligya sa mga kompaniya nga iya sa mga cronies sa conjugal dictatorship. Apan mosaler ba usab kini karong panahona? I-boycott kaha sa katawhan ang mga kompaniya nga iya sa mga bag-ong cronies ug bata-bata sa Malacanang? Di kaha mobayad ang katawhan sa ilang buhis sa BIR ug sa ilang mga bayrunon sa mga pasilididad publiko sama sa tubig, kuryente ug sa ahensiya sa gobyerno sama sa SSS, GSIS, Philhealth ug uban pa?

Para kanako nindot paminawon ang gisugyot ni senador Ping isip paagi sa paglumpag sa mapahimuslanon nga gobyerno. Mao usab kini ang sugyot sa mga rebeldeng grupo aron mawad-an og pundo nga ipalit og bala ug bomba sa ilang kontra aron mosurender na kini ug maminaw sa yangungo sa katawhan. Apan alang kanako husto ang sugyot sa senador apan mali ang nanawag. Nisaler si Cory kaniadto tungod sa iyang pagkayanong asawa ni Sen. Ninoy nga gipatay sa mga tirador. Putli ug tiunay ang iyang tinguha sa pagpanawagan ug kausaban busa nakabig niya ang suporta gikan sa moral force sa simbahan ug civil society groups.

Busa karon pa lang daan, gibato na siya sa daghang batikos gikan mismo sa iyang mga kauban sa senador. Hinuon, unsa may K sa senador nga magpatawag og boycott kung siya mismo angayang buykuton?

Walk-out

Nagbahad nang daan ang mga senador nga mo-walk out sa SONA ni GMA sa Hulyo 27. Kini kung madyikon sa mga kongresista ug himuon nilang con-ass ang SONA subay sa ilang gipasang resolusyon sa pag-usab sa konstitusyon nga way labot ang senado.

Wala daw ulaw ang mga kongresistang anaa sa palad sa Malaca¤ang kung buhaton nila kini busa molingkod na sila daan sa likod aron mas sayon ang ilang paghikling.

Si GMA mohimo sa iyang katapusang SONA atol sa pag-abli sa sesyon sa kongreso. Dinhi iyang ibutyag ngadto sa publiko ang iyang nahimo, tinuod man o dili, ug ang lakang sa iyang administrasyon hangtud mahuman kini sa 2010. Ambot kaha kung iyang tukion pagbalik ang iyang saad ngadto sa "barkong papel" sa mga bata sa Payatas ug uban pang saad ug plano alang sa kalambuan nga hangtod karon nagpabiling naglupad sama sa eroplano kay wa pa mahimo.