Ni Al Genoguin       
Kontra Balanse
    
Karong Hulyo 1, 2009, magsaulog sa 42 anyos nga anibersaryo ang tulo ka mga lalawigan sa Davao-- Davao del Sur, Davao del Norte, ug ang Davao Oriental.. Sa ilang tulo, ang Mati mao ang kaulohang lungsod sa maong probinsiya maoy nagbangutan tungod kay bag-o lang siya gihukasan sa iyang pagka-dakbayan.

Giklaro sa atong local government code ang mga sumbanan kon unsaon nga mahimong siyudad ang usa ka lungsod. Una, kinahanglan duna kini income nga dili moubos sa P100 milyones "for three consecutive years and duly certified by municipal and provincial tresurer". Ikaduha, duna kini lumolopyo nga dili moubos sa 150 mil inhabitants, duly certified by National Statistics Office kun (NSO). Ug ang ikatulo kinahanglan duna kini gilapdon nga mominus sa 100 square kilometers.

Sumala sa atong inpormasyon nga nakuha, ang Mati mikita lamang og P50 ngadto sa P60 milyones matag tuig, mao nga dili gyud siya kwalipikado nga mahimong usa ka siyudad.

Pangutana lang, nganong nakalusot man kini sa debate didto sa hawanan sa Kongreso nga kulang man kini sa mga rekisitos? Kamong taga Mati, pangutan-a daw ninyo ang inyong kongresman sa unang distrito niadtong tuig 2007, kay siya ang angay motubag niini ngano nga ang Mati nahukasan sa iyang pagka- dakbayan.

A(H1N1) KATINGALAHAN

Kada gabii sa atong pagtan-aw og balita sa telebisyon, gihatagan gyud og dakong luna ang balita sa A(H1N1), ngano kaha? Magduda man lang hinuon ta nga kini gipanguwarta kay epektibo kaayo ang pagpanghadlok nila sa A(H1N1) virus ginamit ang media tungod kay kusog ang halin sa mga medical materials nga dili sagad paliton sama sa alkohol ug face mask. Katingad-an kaayo ning maong sakit, kay matud pa, naa kunoy namatay nga gitakbuyan sa maong kagaw apan dunay sakit sa kasingkasing, TB ug pulmonya. Ano ba yan, pag-sure mo uy? Sakit sa kasingkasing lang bisan ug wala pay A(H1N1) virus patay ka na. Dugangan pa sa TB ug pulmonya, triple murder na, ano ba talaga doc? Matud pa sa ubang doctor, ang tambal kuno sa A(H1N1) virus naa ra makita sa atong kusina, kanang luy-a, ahos, ug sibuyas.

Kon mao, dili hulga sa panglawas sa tawo kining sakita kay naa ra man diay ang tambal sa atong balay.

Para nako mas delikado pa ang pinaakan sa lamok kun dengue kay dili ka magdugay kon imong pasagdan. Busa dili angay palab-anan ang balita aron dili malisang ang mga tawo.