Suliran sa brownout gipangita'ag solusyon

Sunday, March 7, 2010

GISUPORTAHAN sa Cotabato City Chamber of Commerce and Industry ang position paper sa Mindanao Business Council nga voluntary de-loading program, diin gituohang dakong ikatabang isip solusyon sa nagkasamot nga problema sa rotating brownout sa Mindanao.

Matud pa ni Pet Marquez, Presidente sa CCCCI, nga dakong uyon sila sa position paper sa Mindanao Business Council nga gipangulohan sa presidente nga si Vicente Lao.

Have something to report? Tell us in text, photos or videos.

Sa maong position paper, gihangyo ang mga dagko nga kompaniya sa Mindanao susama sa Dole Philippines ug ubang planta, mga nanag-iya og mga canning factories ug dagkong mall, nga boluntaryong dili mogamit og kuryente gikan sa linya sa national Grid Corporation of the Philippines (NGCP).

Gihangyo sila nga mogamit una sa ilang generator set bisag walay brown-out aron nga makunhoran ang taas nga rotating brown-out.

Pinaagi niini, mga balay ug gagmay'ng kompaniya nga dili makapalit og generator na lang ang masuplayan og kuryente sa NGCP.

Nasayrang nga sa Central Mindanao, miabot na sa siyam ka oras ang rotating brown-out ug tig-tulo ka oras na ang gidugayon sulod sa 24 oras.

Mga opisyal sa Cotabato Electric Cooperative nga maoy ga-supply ug kuryente sa North Cotabato, nga posibleng motaas pa hangtud 15 ka oras ang rotating brownout sa umaabot nga panahon tungod sa epekto sa El Niño.

Gipahayag ni Cotelco General Manager Engr Marino Gornez nga wala na nila gisunod ang direktiba sa NGCP nga rotating brown-out isip protesta ngadto sa gobyerno ug wala na nila gi-shutdown ang linya sa kuryente sa ilang mga Sub-station.

Posible sab nga wala nay brown-out sa North Cotabato kung uyonan sa Mount Apo Geothermal Plant ang hangyo sa mga lokal opisyal nga gipangulohan ni Governor Jesus Sacdalan ug mga personahe sa Cotelco nga mag-suplay og kuryente sa probinsiya. (Edgardo Fuerzas)