USA ka sundalo ang gidagit samtang gihipos ang daghan armas sa mga rebeldeng New People's Army (NPA) sulod sa gibantayan niining detachment sa alas 6:30 sa gabii niadtong Lunes didto sa Barangay Casoon, Monkayo, Compostela Valley Province.

Sigun sa gipadangat nga mensahe sa 10th Infantry Division sa Superbalita, ang sundalo mao si Corporal Dominador Algere sakop sa 72nd Infantry Batallion sa Philippine Army.

Suma sa militar sa ilang text message, gipahimuslan sa mga rebelde ang higayon nga milakaw ang mga sakop sa Citizen Armed Forces Geographical Unit (Cafgu) sa ilang detachment nga walay armas samtang nag-ampo sa ilang mga mahal sa kinabuhi atol sa Kalag-kalag.

Mga rebelde milampos sa pagkuha sa duha ka mga M16, usa ka M14, lima ka carbine, napulo ka garand ug usa ka i-com radio.

"This is a proof of the NPA's deceptive methods. They will do their worst to destroy our communities and oppress our countrymen," suma sa maong mensahe.

Gidugang sa militar nga ilang himuon ang tanan nga mapanalipdan ang atong nasud ilabi na ang katawhan.

Giingon sa militar nga bisan pa man niini, padayon gihapon silang magbantay sa mga proyekto sa gobyerno alang sa katawhan sa kabukiran.

"To bring the much needed infrastructure and services to our people, the incident will not hamper our soldier's effort to protect our communities and genuinely protect our people from any threat to national development," suma sa maong mensahe.

Gilutos na karon sa kapulisan ug militar ang mga rebelde nga maoy responasable sa maong insidente.