CHIKA nga grabe gyud karon ang pagmahay ni Sunshine Dizon sa iyang nahimo tungod kay na-realize niyang daghan kaayo ang nawala kaniya sa GMA.

Si Sunshine unang gi-tsugi sa show nga "Tinik sa Dibdib" diin siya pa naman unta ang bida tungod sa isyung unprofessionalism. Makapila daw na-tengga ang taping sa show tungod kang Sunshine.

Human siya gitangtang sa "Tinik..." gi-tsugi sab siya sa Unang Hirit diin naa unta siya'y regular nga hosting stint.

Wala na sab gidayon ang paghatag kaniya sa kahigayunan nga mahimong kabahin sa Starstruck V jurors tungod kay gihatag na kini kang Iza Calzado.

Karon daw, nangayo na gyud og sorry si Sunshine ug misaad sa GMA nga tarungon na niya ang iyang trabaho ug di na mag-usab.

Matud pa nga bisan sa "Unang Hirit" lang siya pabalikon, okay na kini kaniya.

Kahinumduman nga gisulti ni Sunshine nga love kaayo niya ang "Unang Hirit" tungod kay dugay na sab niyang pangandoy ang pag-host og show.

Imposible na sab kaayo nga makabalik pa sa TSD tungod kay si Nadine na ang mi-eksena sa iyang papel. Gani, giusab sa mga scriptwriters ang istorya sa serye aron nga di awkward nga si Nadine na ang bida nga obviously, lahi ang nawong kang Sunshine.

Di na sab daw madayon ang unang plano ni Sunshine nga moadto sa Amerika aron makauban ang iyang amahan.