12 nanumbol nakalahutay, moagi'g bangag sa dagom

DILI pa makasiguro ang 12 ka mga manumbolay nga nakalusot sa unang elimination round nga maangkon ang nagsinaw-sinaw nga tropeyo ug ang ganting salapi sa 1st Sun.Star-Superbalita Mindanao Open 9-Ball Challenge didto sa ikatulong andana sa B3 NCCC Mall ning siyudad sa Davao.

Ang 12 ka mga manumbolay maoy milahutay sa kinatibuk-ang 57 ka mga bilyarista nga nakigbugno niadtong Biyernes sa unang imbukada sa elimination round knockout system.

Si Romeo Timcang Romeo, beteranong magdudula dinhi sa siyudad sa Davao, nakalusot sa kuyaw nga manumbolay nga si Nelson Pa-a, 7-4 sa ilang kombate niadtong Biyernes.

Tulo pa sa nakalusot nagagikan sa dakbayan sa Digos nga mao sila Randy Alipan, Cocoy Villafuerte ug Danjo Ordaneza.

Si Alipan nagpildi kang Salik Maded, 7-2, samtang si Villafuerte mikuniskunis kang Boy Branzuela nga taga siyudad sa Davao, 7-1, ug Ordaneza mipalagpot kang Eliaz Desierto, 7-6.

Wala sab magpapiog si Romeo Alcano kang Alex Villadones nga gipukan niya, 7-5 ug si Val Pajuay nga naglampurnas kang Jhong Daquiado, 71.

Uban pang milusot mao si Danny Otacan nga taga San Francisco, Agusan del Sur nagpildi kang Sonny Aton, 7-4, Benjie Soliman nagpildi kang Arman Natividad, 7-1, Allan Abuel mibuntog kang Richard delos Reyes, 7-4, Rustom Quibod nga taga Pikit, North Cotabato nagpalagpot kang Darrel Cubillan, 7-5, Lloyd Meachavez misipa kang Topher Alanunay, 7-3, ug si Anthony Adonis nga taga siyudad sa Pagadian nagpusgay kang Rodney Rubio nga taga Toril ning siyudad sa Davao, 7-1.

Ang mga nahisgutan mosalang na sab og laing elimination round diin ang top 6 maoy mosulod sa quarterfinals aron nga mahiusa sa mga seeded players nga sila si Gandy Valle ug Elmer Haya.

Ang walo ka mga magdudula, apil sila Valle ug Haya magsangka ug ang top 4 players maoy magkombati sa semi-final round.

Ang modaug kanila magsangka samtang mga pildi magtigi sab alang sa Finals.

Ang torneyo gipasiugdahan sa Sun.Star Davao ug Superbalita pinaagi sa pagpakig-alayon sa Davao Billiards Association.

Gipaluyohan sab ang torneyo sa Banok's, Aquabest ug Ginebra San Miguel isip maoy mga sponsors.

Ang torneyo naghanyag og P30 mil nga premyo ug tropeyo alang sa kampeyon. (WGM)